Ing mê, Kăn pơkuâ hnê ngăn cheăng Đảng pơkâ kĭăm jâ Huỳnh Thị Chiến Hòa, Ngế cheăng tung khu kăn pơkuâ hnê ngăn cheăng Đảng kong pơlê, Kăn hnê ngăn Hô̆i đong kuăn pơlê dêi kong pơlê Dak Lak pơtối pro Kăn phŏ pơkuâ hnê ngăn cheăng Đảng kong pơlê hneăng hơnăm 2020-2025.

Jâ Huỳnh Thị Chiến Hòa kot mâ hâi lơ 18/04/1973, pơlê xiâm Quảng Ngãi. Hdrối vâ châ pôk pro Kăn phŏ pơkuâ hnê ngăn cheăng Đảng kong pơlê Dak Lak, jâ Huỳnh Thị Chiến Hòa hiăng pêi mâu hnoăng cheăng pro Kăn phŏ pơkuâ Khu xiâm ngăn tơdroăng Pơkâ ƀă ‘no Liăn cheăng kong pơlê Dak Lak; Ngế pơkuâ Khu xiâm ngăn ‘na tơdroăng cheăng pêi Dak Lak; Ngế cheăng tung Khu kăn, Ngế pơkuâ mơhnhôk cheăng kal kí cheăng  Đảng kong pơlê Dak Lak; Kăn hnê ngăn Hô̆i đong kuăn pơlê dêi kong pơlê Dak Lak.

Tơbleăng drêng xo hnoăng pro kăn, jâ Huỳnh Thị Chiến Hòa ăm ‘nâi, kô mơ-eăm pêi cheăng tâi ivá tơná drêng dế pro kăn ki nếo, pêi cheăng tá tuăn mơno, rĕng tơdah xo hnoăng cheăng pêi ki nếo tơdrêng ƀă mâu kăn hnê ngăn kong pơlê Dak Lak tơrŭm môi tuăn, mơ-eăm tá hiâm mơno, rĕng mơnhông Dak Lak xông tơniăn.