Tung pơla lăm pôu pêi cheăng păng ‘nâng Việt Nam, jâ Takaichi Sanae, Ngế pro xiâm hnê ngăn kong têa Nhuk hiăng lăm a Tíu chôu ‘măn poăng Pôa Hồ Chí Minh, Kăn xiâm hnê ngăn tơnêi têa hneăng apoăng; ‘măn rơvĭu reăng a Tíu koh tơbâ mâu Ngế khên tơnôu hlâ tung tơplâ xâ a troăng kân Bắc Sơn, Hà Nội. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tơdah Ngế pro xiâm hnê ngăn kong têa Nhuk.

Pôa Lê Minh Hưng, Ngế pro xiâm hnê ngăn tơnêi têa tơdah, tơpui tno ă rơtế jâ Takaichi, Ngế pro xiâm hnê ngăn kong têa Nhuk trâm mâ khu chêh hlá tơbeăng vâ tối ‘na tơdroăng châ tơƀrê tơpui tơno. Klăng roh kố, veăng châ hlo amê dêi pôa Lê Minh Hưng, Ngế pro xiâm hnê ngăn tơnêi têa ƀă jâ Takaichi Sanae, Ngế pro xiâm hnê ngăn kong têa Nhuk, mâu khu xiâm, kơvâ cheăng, kơ koan, kong pơlê péa tơnêi têa diâp 6 mơ-éa ki kal tơrŭm cheăng.

A mâu roh trâm mâ, hôp tơpui tơno ƀă trâm mâ, kăn pơkuâ Việt Nam hâk ro roh lăm pôu pêi cheăng dêi Ngế pro xiâm hnê ngăn kong têa Nhuk rơtế Khu râ kăn teăng mâ râ kăn xiâm dêi Chin phuh kong têa Nhuk tơkŭm po a roh ki kal, ai kơnâ kal khât drêng tŭm péa tơnêi têa pơrá ai khu râ kăn pơkuâ nếo, dế mơ-eăm pêi pro mâu pơkâ mơnhông cheăng kâ – rêh ối pơlê pơla dêi rêm tơnêi têa.