Dó inâi “Dak Lak-ivá cheăng, púi rơhêng vâ mơnhông” Roh hôp Mơhnhôk mơ’no liăn cheăng dêi hơnăm 2026 dêi kong pơlê tiô tối ahdrối kô tơdah dâng 1.000 ngế kăn teăng mâ tung tơnêi têa ƀă kong têa ê. Tơdroăng ki kal kố ai ta pêi pro hên mâu roh hneăng hôp ki xiâm, hôp mơjiâng pêi pro, pêi pro mâu tơmeăm khoăng ki kal, tơ’mot khu mơdró kâ veăng mơ’no liăn, tí tăng ngăn tíu ki vâ mơ’no liăn ngân cheăng kâ, roh hôp tối nhên xiâm kối ƀă mâu roh trâm mâ pơla mâu kăn dêi khu kăn hnê ngăn ƀă khu mơdró kâ.

Ki kal dêi Roh hôp kố mê cho inâi dêi 133 tơdroăng tơkêa bro mơ’no liăn cheăng pơla sap ing hơnăm 2026-2030, tâi tâng kơxô̆ liăn ki pêi cheăng kâ mê vâ chê 552.000 rơtal liăn, pêi pro tung hên kơvâ cheăng, ing tơdroăng ki vêh mơjiâng pro on tơhrik ing mâu hyôh tôu dêi mâ hâi, ing hyôh khía, mâu hngêi trăng, troăng prôk ki cheăng kâ kơmăi kơmok, kơphô̆, ôm hyô ta troh a tơdroăng pêi chiâk deăng kŏng ngê̆ ki ó chal nếo bă ‘na pơkeăng ƀă khăm pơlât.

Tung mê, kong pơlê Dak lak rah xo ai dâng 20 tơdroăng tơkêa bro ki kal xiâm vâ tơkŭm pêi pro mâu tơdroăng ki hnê mơhnhôk, tơdrêng amê, pơkâ ki pơcháu hnoăng cheăng ki mơ’no liăn mơjiâng pro 26 rơtơdroăng tơkêa bro, tâi tâng kơxô̆ liăn ki kĭ tơkêa mê ai lối 48.300 rơtal liăn a roh hôp mê.

Veăng pêi pro kêi ki xiâm dêi tơdroăng hbrâ rơnáu mê, pôa Nguyễn Thiên Văn, Phŏ Kăn hnê ngăn Vi ƀan kong pơlê Dak lak hiăng pơkâ thế vêh mơnhên ngăn, mơjiâng pro tơ’nôm mâu tơdroăng ki ối ‘ro, malối ‘na kơvâ ngăn ‘na khăm pơlât ƀă hnê mơhriâm, mâu kơvâ cheăng ki dế ai hên mâu khu ki veăng mơ’no liăn tŏng gum:

“Tung tơdroăng pơkâ vê hdró dêi kong pơlê roh kố, pin ai mâu kơpong tơnêi ki vâ pro mâu tíu ki vâ ăm vâi krâ ki pơtê pơto, mâu hngêi pơkeăng ki khăm pơlât mê athế krếo thế khu mơdró kâ veăng mơ’no liăn cheăng. Tung kơvâ hnê mơhriâm, kal athế ai tơnêi vâ mơhnhôk tâi tâng kuăn pơlê veăng tơlo liăn ngân, mơjiâng pro mâu hngêi trung râ má môi má péa ki kân rơdâ, krá kâk, tơ’mot hên kuăn ‘nĕng cháu cháu i mơhriâm”.

Pôa Đỗ Hữu Huy, Kăn hnê ngăn Vi ƀan kong pơlê Dak Lak ai tối mơnhên, tơdroăng pơkâ thăm mơdêk ki kal dêi roh hôp kố, ngăn kố ôh ta xê to tơdroăng ki mơhnhôk khu mơdró kâ veăng  mơ’no liăn ngân xo xo mê athế chiâng “tíu ki kal” vâ khoh kâi châ tơ’mot khu mơdró kâ veăng mơ’no liăn ngân mơjiâng pro mâu tơmeăm khoăng ki kal dêi hơnăm 2026.

Tiô pôa Đỗ Hữu Huy tối ăm ngin ‘nâi, kong pơlê hiăng ƀă dế hbrâ mâu tơdroăng ki kal má môi, hbrâ rơnáu tŭm kơvâ cheăng vâ tơ’mot, tơdah tơdroăng ki mơ’no liăn cheăng mê. Tiô hiâm mơno tơdjuôm mê athế pơhlêh nhên ing tơdroăng ki hbrâ rơnáu troh a tơdroăng ki pêi pro tơdroăng cheăng, ing tơdroăng ki tơhrâ tơkêa chiâng tơdroăng ki pêi pro tơdrêng hlối mâu tơdroăng ki hiăng pơkâ mê, “hbrâ rơnáu tơdroăng vâ tơdah ki pơhlêh nếo”, ing mê, mơjiâng ivá cheăng ki pơhlêh nếo tiô mâu tơdroăng tơkêa bro ki kân.

“Pơkal athế roh hôp kố pin athế pêi pro lĕm tro tâ, ki păng ‘nâng tâ, prôk tơdrăng tơdroăng ki mơjiâng pro tơmeăm khoăng; khŏm mơ-eăm tung măng tĭng po roh hôp mê athế mơjiâng pro hên tơdroăng tơkêa bro má môi, ki xiâm dêi tơdroăng athế vêh séa mơnhên ngăn vâ ăm ga i tơxâng”.