A thôn Vĩnh Trường, cheăm Phước Dinh, kong pơlê Khánh Hòa, hên rơpŏng kuăn pơlê dế hbrâ xĕn tíu ối nếo vâ pơcháu ƀăng tơnêi mơjiâng Hngêi kơmăi on tơhrik kơtâu ƀă trếo tik nik Ninh Thuận 1. Tơdroăng ki kuăn pơlê tơmâng má môi drêng kố cho kơlo chêl thiĕn, tŏng gum tơdroăng xĕn tíu ối drêng châ xĕn troh tíu ối nếo. Pôa Nguyễn Văn Trong, kuăn pơlê cheăm Phước Dinh tối ăm ‘nâi, drêng khế 3 pơla kố nah, Kuô̆k hô̆i hiăng tơbleăng troăng pơkâ pêi, troăng hơlâ nếo vâ tah lôi mâu tơdroăng pá puât ăm tơdroăng chêl thiê̆n, tăng ƀăng tơnêi, tơpui ƀă pêi pro tơdroăng pâ thế hdrối mê, kuăn pơlê phiu ro.

“Tơnêi têa chêl thiê̆n ai pơxúa ăm kuăn pơlê, vâi krâ kuăn pơlê phiu ro. Tơnêi têa chêl thiê̆n, tŏng gum lĕm má môi ăm kuăn pơlê vâ kơxô̆ liăn to a tíu ối nếo mơnhông mơdêk, ôh tá ai kơbố vêh kơtiê xếo’’.

Rơtế ƀă tơdroăng tăng cheăng pêi ƀă tíu ối nếo, tơdroăng xĕn kuăn pơlê, rơnêu tơnâp jâ pôa cho tơdroăng pro hên ngế kuăn pơlê kơpong tơdroăng tơkêa bro cho tơdroăng ki tô tuăn. Ƀă vâi, kố ôh tá xê to tơdroăng xĕn tơnâp kiâ, mê ối tơdjâk troh tơdroăng loi tĭng, khôi túa vêa vong ƀă tơdroăng ki nhuô̆m ăm mơngế hiăng hlâ. Xua mê, kuăn pơlê pói vâ pêi pro thế ai hâi khế hbrâ inhên, tơtro ƀă khôi túa vêa vong dêi pơlê. Pôa Nguyễn Thanh Hiệp, kuăn pơlê kơpong tơdroăng tơkêa bro, cheăm Phước Dinh tối:

“Rơpŏng á ai 6 tơnâp xĕn tâp tíu ê, á xuân môi tuăn pêi pro troăng hơlâ dêi Đảng ƀă Tơnêi têa pơcháu ƀăng tơnêi mơjiâng hngêi kơmăi trếo tik nik Ninh Thuận 1. Drêng hâi khế tơbâ mâu ngế ki hiăng lêk lôi kố xuân hiăng vâ tâi mê á xuân pơkâ thế cheăm thâ tơdroăng pêi pro, vâ kuăn pơlê ai hbrâ inhên’’.

Mơ’nui khế 3 pơla kố nah, Vi ƀan hnê mơhno má môi Kuô̆k hô̆i tơbleăng Tơdroăng pơkâ tơ’nôm, pơhlêh mâu troăng pơkâ pêi, troăng hơlâ ki phá tơ-ê tung mơ’no liăn cheăng tơdroăng tơkêa bro on tơhrik kơtâu ƀă trếo tik nik Ninh Thuận. Ing mê, pêi kêi đeăng luât ‘na chêl thiê̆n, tŏng gum ƀă vêh xĕn tíu ối, tơdrêng amê tơniăn hnoăng pơxúa ăm kuăn pơlê tung kơpong tơdroăng tơkêa bro. Tiô pơkâ nếo, mâu rơpŏng tŭm pơkâ kô châ pơcháu tơnêi a kơpong xĕn ối ƀă châ kơtê kơtê 100% liăn xúa tơnêi.

Ƀă ƀăng deăng tơnêi pêi chiâk deăng ôh tá xê tơnêi pêt báu hiăng pơhlêh xiâm rêi xúa păng ‘nâng laga tá hâi teăm kĭ tơdroăng ki pơhlêh, Tơnêi têa xuân séa ngăn chêl thiê̆n tiô tơdroăng ki xúa. Pôa Nguyễn Văn Quế, Kăn hnê ngăn Vi ƀan cheăm tối ăm ‘nâi, kơnôm troăng pơkâ pêi, troăng hơlâ nếo, tơdroăng chêl thiê̆n, tăng ƀăng tơnêi dêi tơdroăng tơkêa bro Hngêi kơmăi on tơhrik trếo tik nik Ninh Thuận 2 dế châ mơdêk rĕng.

“Tâi tâng tơdroăng riân, ngế pơkuâ tơnêi troh nôkố hiăng kêi đeăng, ngin hiăng hnê mơhno râ pá kơdâm pêi pro yă tiô Tơdroăng 121 nếo má môi. Tung tâi tâng kơxô̆ mâu tơdroăng ki tŭm châ pêi pro châ 487 rơpŏng’’.

Tiô pôa Nguyễn Văn Nhựt, Kăn pơkuâ Khu pơkuâ Kơmăi kơmok Tê mơdró kong pơlê Khánh Hòa, tâi tâng ƀăng deăng xo tơvêh vâ mơjiâng Hngêi kơmăi on tơhrik kơtâu ƀă trếo tik nik Ninh Thuận 1 ƀă Hngêi kơmăi on tơhrik kơtâu ƀă trếo tik nik Ninh Thuận 2 cho lối 760 ha, ƀă vâ chê 1.400 rơpŏng kuăn pơlê thế xĕn tíu ối. Tơdroăng Kuô̆k hô̆i tơbleăng Tơdroăng pơkâ 121 hiăng tah hên tíu ki kreăng tung chêl thiê̆n, tŏng gum xĕn tíu ối.

Kơnôm mê, tơdroăng tăng ƀăng tơnêi a mâu cheăm bêng dế châ pêi pro rĕng, pro chiâng tơdroăng môi tuăn tung kuăn pơlê. Nôkố  kong pơlê Khánh Hòa dế pêi pro tiô troăng ki thâ, mơ-eăm tăng tơnêi hdrối mơ’nui khế 6 hơnăm kố vâ pơcháu ăm khu mơ’no liăn cheăng pêi pro tơdroăng tơkêa bro.

“Tơdroăng pơkâ kố hiăng tah lôi hên, ki rơhêng vâ tối mâu rơkong pâ thế dêi kong pơlê Khánh Hòa, pơtối pêi pro inhên tâ ƀă trâu tâ ƀă tơdroăng nôkố tung tơdroăng chêl thiê̆n liăn. Xua mê, tơdroăng chêl thiê̆n liăn, tăng ƀăng tơnêi rĕng tâ, hlê plĕng tơdroăng môi tuăn dêi kuăn pơlê. Nôkố kong pơlê dế tơkŭm pêi kơtăng, thâ séa ngăn ƀă pêi pro yă tiô troăng chêl thiê̆n vâ ăm kuăn pơlê tung môi pơla rĕng má môi’’.