Teăng mâ khu râ kăn pơkuâ hnê ngăn Đảng, Tơnêi têa, jâ Trương Thị Mai - Kăn xiâm hnê mơhno má môi tơdroăng cheăng Đảng rơkâu mâu tơdroăng châ tơƀrê Đảng ƀô̆ khô̆i hiăng châ tơƀrê tung plâ 75 hơnăm hiăng hluâ. Tơdrêng amê pơkâ, tung la ngiâ Đảng ƀô̆ Khô̆i kal mơdêk hlê plĕng, pôu râng hnoăng cheăng dêi mâu khu râ pơkuâ hnê ngăn cheăng Đảng, kăn ƀô̆, đảng viên ‘na tíu cheăng, hnoăng cheăng, tơdroăng cheăng, hnoăng cheăng kal kí dêi Đảng ƀô̆ Khô̆i ƀă hnoăng cheăng kal kí dêi rêm khu râ kăn pơkuâ hnê ngăn cheăng Đảng, Đảng ƀô̆, chi ƀô̆, kăn ƀô̆, đảng viên.

Rơtế ƀă mê, tơtrŏng pêi pro kơtăng, djâ troăng ahdrối, châ tơƀrê mâu tơdroăng chêh tối tung mơ-éa, pơkâ ki kal dêi Đảng tung hneăng cheăng XIII môi tiah Mơgêi kơxô̆ 21 – ‘na mơdêk mơjiâng, pơ’lêh tung Đảng ƀă khu cheăng kal kí; khŏm mơ-eăm mơdât, troh tah, pơxâu phâk kơtăng kăn ƀô̆, đảng viên ai troăng tơmiât ôh tá lĕm tro ‘na troăng tơmiât kal kí, hiâm mơno, tơdroăng rêh ối, ai hlo tơdroăng ‘’pro xêh tơ-ê’’, ‘’tơmiât pêi pro tơ-ê’’.