VOV4.Xơ Đăng - A kơxê lơ 16/5, a Văn Miếu - Quốc Tử Giám Hà Nội, jâ Võ Thị Ánh Xuân, kăn xiâm phŏ hnê ngăn tơnêi têa hiăng krếo thế jâ Katerina Sakellaropoulou, Kăn xiâm pơkuâ kong têa Grê-cô veăng ôu chế. Jâ Võ Thị Ánh Xuân rơkâu mâu tơdroăng ki tơniăn lĕm tung rôh hôp tơpui tơno pơla jâ ƀă kăn xiâm pơkuâ kong têa ƀă pôa Nguyễn Xuân Phúc, kăn xiâm hnê ngăn tơnêi têa loi tơngah rôh lăm pôu kố kô tơniăn lĕm, veăng kum mơdêk tơrŭm cheăng pơla Việt Nam prếi Grê-cô pơtối mơnhông tơtro, prôk trâu hngế tâ.

Tơbleăng ăm kăn xiâm pơkuâ kong têa Grê-cô ‘na Văn Miếu-Quốc Tử Giám, kăn xiâm phŏ hnê ngăn tơnêi têa ăm ‘nâi, kố cho tíu xối tơbâ ton nah dêi Việt Nam, mơhno tối khôi hmâ rơhêng vâ hriâm, rah xúa mâu ngế ki rơkê dêi hdroâng kuăn ngo Việt Nam lối rơpâu hơnăm hdrối nah.

Tung tơdroăng ki hơniâp ro, tơrŭm achê, jâ Võ Thị Ánh Xuân krếo thế kăn xiâm pơkuâ kong têa Grê-cô veăng a rôh ôu têa chế tiô tơdroăng tĭng dêi Việt Nam ƀă mâu túa chế ki vâi ô eăng dêi Việt Nam; ngăn mơđah tơbleăng xâp ếo xŏn ƀă hmâng mâu ƀai hơdruê, xoâng khôi hmâ ki lĕm hơniâp dêi Việt Nam.

Katarina Nga tơplôu ƀă tơbleăng