Tung tơdroăng phiu ro dêi Têt Trung thu, jâ Võ Thị Ánh Xuân rơtế khu râ kăn pêi cheăng ƀă khu râ kăn pơkuâ kong pơlê Dak Lak hiăng veăng mâu tơdroăng pêi: lăm ngăn, châ hlo mâu tơdroăng xah hêi tiô khôi vâi krâ nah, pro on kơđĕng tơdrong, tơdah on tơdrong, ngăn xuăng prếo ƀă châ ngăn mâu tơdroăng hơdruê xuăng a kơmăng khế mơniâ.

Roh kố, jâ Võ Thị Ánh Xuân hiăng diâp 270 hnoăng liăn hriâm rơkê, 120 toăng rơxế mái ăm hok tro ai tơdroăng rêh ối pá puât, 1 toăng hngêi ăm vâi hdrêng kuăn tê ƀă 1.500 kơxuô tơmeăm kơnâ lối 1 rơtal liăn. Kăn xiâm phŏ hnê ngăn tơnêi têa pói vâ, tung la ngiâ, mâu kơ koan, tíu cheăng ƀă mâu tơdroăng pêi ki nhên, pơxúa, mơhnhôk tơdroăng ki veăng dêi khu cheăng kal kí, pơlê pơla khu tê mơdró ƀă lâp pơlê pơla pơtối rak ngăn, teăm tơdrêng mơhnhôk, tŏng kum vâi hdrêng, hok tro ai tơdroăng rêh ối pá puât ƀă ngăn kố cho hnoăng cheăng ki xiâm, ton xŏn.