VOV4.Xơ Đăng - Kơxo lơ 17/6, jâ Võ Thị Ánh Xuân, Kăn xiâm phŏ hnê ngăn tơnêi têa hiăng tơdah Đăi đô̆i khu kơdrâi vê rơxế Trường Sơn. Khế 12/1968, Đảng ủy Khu xiâm pơkuâ lêng Trường Sơn hiăng pơkâ mơjiâng khu vâi kơdrâi vê rơxế Trường Sơn vâ tŏng kum khu pêi cheăng a tíu tê mơdró ngi kong têa ê. Xông tơpui a roh trâm mâ, teăng mâ khu râ kăn pơkuâ Đảng, Tơnêi têa, jâ Võ Thị Ánh Xuân pơtroh rơkong troh mâu khu vâi kơdrâi vê rơxế Trường Sơn pâ mơnê hnoăng ƀă mâu tơdroăng tuăn pâ lĕm má môi.

Kăn xiâm phŏ hnê ngăn tơnêi têa diâp kơxuô tơmeăm tơbâ ăm mâu vâi kơdrâi vê rơxế Trường Sơn

Kăn xiâm phŏ hnê ngăn tơnêi têa mơnhên ƀă kheăn kơdeăn mâu tơdroăng veăng kum ƀă mâu tơdroăng châ tơƀrê dêi mâu lêng Khu vâi kơdrâi vê rơxế  Trường Sơn tung roh tơplâ xâ Mih tŏng kum tơnêi têa. Kăn xiâm phŏ hnê ngăn tơnêi têa tối nhên, tơdroăng ki pleăng ôh tá pơ’lok dêi mâu nâ hiăng kum kân kĭn rơtế hdroâng kuăn ngo pro chiâng ƀlêi trâng lĕm. Kăn xiâm phŏ hnê ngăn tơnêi têa pói vâ Khu xiâm pơkuâ lêng, Kơ koan xiâm kum pa rŏng, Kơ koan xiâm pơkuâ rơxế pơto tơmeăm pơtối ai tơdroăng tơmâng, rak ngăn hên tâ nếo ƀă mâu vâi kơdrâi vê rơxế Trường Sơn.

A Sa Ly tơplôu ƀă tơbleăng