VOV4.Xơ Đăng - Tơmiât troh Leh tơbâ 75 hơnăm Hâi mô đô̆i rong râ hlâ hía (27/7/1947 – 27/7/2022), kơxo lơ 10/6, a Tíu pêi cheăng Kăn xiâm hnê ngăn tơnêi têa, jâ Võ Thị Ánh Xuân, Kăn xiâm phŏ hnê ngăn tơnêi têa tơdah khu râ kăn teăng mâ mơngế ai hnoăng kong pơlê Dak Nông klăng roh lăm pôu pơlê kong xiâm ƀă lăm pôu ngăn tíu ‘măn poăng Pôa Hồ. Nôkố kong pơlê Dak Nông ai lối 13 rơpâu ngế ai hnoăng tơnêi têa, tung mê ngế châ mơhá hnoăng liăn rêm khế cho vâ chê 3 rơpâu ngế.

Rơtế ƀă troăng hơlâ kơjo dêi Đảng ƀă Tơnêi têa, tơdroăng tâi tâng kuăn pơlê rak ngăn mô đô̆i rong râ, châi tamo, rơpŏng ai mô đô̆i hlâ tung tơplâ xâ ƀă mơngế ai hnoăng ƀă kăch măng dêi kong pơlê châ tơƀrê hên, mơnhông mơdêk ivá ó rơdêi tâi tâng kuăn pơlê veăng. Ki xiâm, tơdroăng rêh ối mâu ngế ai hnoăng tung kong pơlê tơniăn.

Jâ Võ Thị Ánh Xuân, Kăn xiâm phŏ hnê ngăn tơnêi têa diâp kơxuô tơmeăm tơbâ ăm mơngế ai hnoăng kong pơlê Dak Nông

Tơpui tơno ƀă khu ngế teăng mâ mâu ngế ai hnoăng kăch măng kong pơlê Dak Nông, jâ Võ Thị Ánh Xuân tối pâ mơnê ƀă mâu ngế ai hnoăng dêi kong pơlê Dak Nông, pói vâ kong pơlê mơnhông mơdêk khôi túa rŭm môi tuăn, pâ nhuô̆m tơnêi têa dêi vâi krâ kuăn pơlê hdroâng kuăn ngo Tây Nguyên  tơdjuôm ivá mơjiâng pơlê xiâm pêi pro tơtro 2 hnoăng cheăng mơjiâng ƀă gâk kring tơnêi têa, tơdrêng amê pơtối tơmâng pêi pro tơtro troăng hơlâ ngế ai hnoăng, vâ hnê hriâm hiâm mơno pâ nhuô̆m tơnêi têa, tơdroăng ki tro ‘ló dêi hdroâng mơngế ƀă pơlê pơla.

A Sa Ly tơplôu ƀă tơbleăng