Tối ăm kăn xiâm phŏ hnê ngăn tơnêi têa Việt Nam, kăn xiâm pơkuâ kong têa Mozambique cho pôa Nyusi mơnhên tối khât rôh lăm pôu dêi khu kăn kố, tối tơdroăng ki tơngah rôh lăm pôu dêi kăn xiâm phŏ hnê ngăn tơnêi têa ƀă mâu tơdroăng cheăng ki pơtroh mâu khu râ kăn troh a tơnêi dêi rơpó kô pơtối bro ivá nếo, veăng kum mơdêk tâ nếo tơrŭm cheăng tung hên kơvâ pơla Việt Nam – Mozambique tung la ngiâ.

A rôh trâm mâ, péa ngế kăn xiâm pơkuâ tối môi tuăn ‘na mâu tơdroăng klêi kơ’nâi tơrŭm cheăng ki châ rơhéa tung vâ chê pơtăm chât hơnăm hdrối nah, malối cho tung kơvâ cheăng kal kí, tơpui kâ, pêi chiâk deăng, viễn thông, hnê hriâm, hnê cheăng pêi ƀă tơrŭm tung mâu rôh hôp ki hên kơvâ cheăng môi tiah Khu lâp kong têa ƀă tơdroăng Ôh tá tơrŭm.

Péa ngế kăn xiâm pơkuâ môi tuăn ƀă mâu Khu xiâm, kơvâ cheăng ki ai tơdjâk troh dêi péa pâ tơpui tơno ƀă ai mâu tơdroăng tơkêa nhên tiô troăng tơmiât tơrŭm cheăng hiăng châ mâu kăn pơkuâ péa pâ mơnhên.