Kơxê lơ 10/1, a Hà Nội, Khâu tơrŭm tơroâ Việt Nam tơkŭm po tơdroăng trâm mâ tơrŭm ƀă Khu ki tơpui kâ, mâu khu tơrŭm kong têa ê ƀă pa kong Chin phuh kong têa ê a rơnó Hơngui Quý Mão 2023. Jâ Võ Thị Ánh Xuân veăng hôp ƀă tơpui a rôh trâm mâ. Tơpui a rôh trâm mâ mê, teăng mâ kăn xiâm pơkuâ Đảng, Tơnêi têa ƀă kuăn pơlê Việt Nam, jâ Võ Thị Ánh Xuân tối nhên, hơnăm 2023 ai pơxúa kal khât ƀă Việt Nam, cho hơnăm ki pa kong tung tơdroăng pêi pro Túa pơkâ mơnhông mơdêk cheăng kâ rêh ối pơlê pơla 5 hơnăm 2021 – 2025.

Việt nam pơtối kơjo kum hbrâ mơdât tơƀrê pơreăng, rak vế tơniăn cheăng kâ kân, mơdêk mơnhông. Mơdêk rơdêi hơ’lêh tâ nếo, hơ’lêh kơxô̆, mơdêk ki ngiât lĕm, rak vế hyôh kong prâi tơnêi tíu, hbrâ ví ƀă kong prâi pro hơ’lêh. Kăn xiâm phŏ hnê ngăn tơnêi têa loi tơngah tiah kố, tung hiâm mơno tơrŭm tơniăn lĕm tung hên hơnăm hdrối, mâu kơ koan teăng mâ tơpui kâ, mâu khu tơrŭm kong têa ê ƀă mâu khu tơrŭm pa kong Chin phuh kong têa ê kô pơtối tơrŭm krá tơniăn ƀă Việt Nam, xua tơdroăng ki mơnhông krá tơniăn ton, kro mơdrŏng, hơniâp lĕm dêi Việt Nam, xuân môi tiah dêi tâi tâng mâu kong têa, hdroâng mơngế tung lâp plâi tơnêi.