Klêi kơ’nâi 32 hơnăm vêh mơjiâng, troh nôkố kong pơlê Lào Cai ối má môi tung 14 kong pơlê Trung Du ƀă kong ngo peăng kơnhŏng tơnêi têa. Kơlo tơtêk cheăng kâ tơdâng vâ chê 10%/hơnăm; tâi tâng xo hnoăng liăn ngân tơnêi têa tung kong pơlê châ lối 10 rơpâu rơtal liăn; kơxô̆ rơpŏng kơtiê kơdroh rĕng, sap ing 54,8% (1991) chu u ối 19,3%.

Tung tơdroăng hriâm tâp ƀă pêi tiô Pôa Hồ, Đảng ƀô̆ ƀă kuăn pơlê mâu hdroâng mơngế a kong pơlê Lào Cai hiăng hbrâ xêh, thăm tí tăng, ai troăng pêi rơkê ƀă tơdroăng rĕng tơbleăng pơkâ djâ troăng ahdrối ăm kăn ƀô̆ pơkuâ ki xiâm ƀă ngế ối a ko, ai pơkâ krê ‘na hriâm tâp ƀă pêi tiô Pôa Hồ tung lâp kong pơlê rĕng má môi lâp tơnêi têa.

Rêm hơnăm pơrá tơbleăng tơmeăm mơnhên châm điêm hriâm ƀă pêi tiô Pôa Hồ. Sap hơnăm 2016 troh nôkố, lâp kong pơlê Lào Cai hiăng kheăn kơdeăn ăm 3 rơpâu 356 khu pú hên, ngế krê châ tơƀrê hriâm tâp ƀă pêi tiô Pôa Hồ. Jâ Võ Thị Ánh Xuân pơchân tối: Đảng ƀô̆ kong pơlê Lào Cai kal ai mâu troăng pêi kơtăng mơnhông hiâm mơno rŭm môi tuăn, tơdrêng amê ai mâu troăng hơlâ, troăng pêi tŏng kum tơtro, ƀă mơnhông vâ kuăn pơlê mơ-eăm ƀă kơpeăng kŏng dêi tơná, pro ti lâi vâ kuăn pơlê mâu hdroâng kuăn ngo mơnhông mơdêk tơdâng tơ’mô ƀă châ pơxúa mâu tơdroăng châ tơƀrê mơnhông dêi tơnêi têa.