VOV4.Xơ Đăng - Tung hneăng lăm pôu veăng hôp to khu râ kăn xiâm vâi kơdrâi tung lâp plâi tơnêi hơnăm 2022 (GSW 2022) a kong têa Siam, jâ Võ Thị Ánh Xuân, Kăn xiâm phŏ hnê ngăn tơnêi têa trâm mâ kuăn pơlê Việt Nam a Udon Thani, kong têa Siam ƀă hlối pôu ngăn Trường Khánh An. A rôh trâm mâ, klêi tơmâng tối tơbleăng tơdroăng dêi kuăn pơlê Việt Nam ki rêh ối a kong têa Siam, jâ Võ Thị Ánh Xuân rơrêk tung hiâm mơno drêng trâm kuăn pơlê, khĕn kơdeăn tơdroăng tơrŭm môi tuăn dêi rơpó, ‘nâi tŏng kum dêi rơpó pơla mâu ngế Việt Nam pin, hiâm mơno hmâ pâ dêi rơpó, pâ pơlê xiâm, tơnêi têa tơná.

Jâ Võ Thị Ánh Xuân, Kăn xiâm phŏ hnê ngăn tơnêi têa xuân tơbleăng tơdroăng tung tơnêi têa ƀă mâu tơdroăng ki hâk ro, dế chôa mơnhông cheăng kâ klêi kơ’nâi ai pơreăng kân COVID-19; tối Đảng ƀă Tơnêi têa đi đo tơmâng khât troh kuăn pơlê mơngế Việt Nam a kong têa ê tối tơchoâm ƀă kuăn pơlê mơngế Siam xiâm rêi Việt Nam tối krê; púi vâ Khu ngăn mơngế Việt Nam tung lâp kong têa Siam ƀă Khu pơkuâ ngăn khu mơngế Siam xiâm rêi Việt Nam kô rế pơtối rak vế hnoăng cheăng xiâm dêi pơlê pơla, ai tiô tơdroăng púi vâ dêi kuăn pơlê tung mâu tơdroăng tơrŭm môi tuăn, tơkŭm kuăn pơlê, hnê hriâm nâl Xuăn , pâ troh dêi pơlê xiâm tơnêi têa.

Gương tơplôu ƀă tơbleăng