Mơngế Việt Nam a Mozambique nôkố ai dâng 200 ngế, rêh ối, pêi cheăng tơniăn a kong têa kố, pêi mâu kơvâ cheăng môi tiah tê mơdró, hyôh măng ƀă internet, hnê hriâm, khăm pơlât ƀă mâu hok tro, sinh viên.

Kăn xiâm phŏ hnê ngăn tơnêi têa hiăng tối ‘na tơdroăng kal kí, cheăng kâ, rêh ối pơlê pơla, xông tơniăn klêi kơ’nâi tâi pơreăng COVID-19 tung tơnêi têa mâu hơnăm hdrối kố nah; tối tơbleăng ‘na tơdroăng châ tơƀrê dêi roh lăm pôu pêi cheăng Mozambique ing mâu roh tơpui tơno ƀă Ngế pro xiâm hnê ngăn kong têa Mozambique, trâm mâ tơpui tơno ƀă Kăn xiâm hnê ngăn Kuô̆k hô̆i kong têa Mozambique, trâm mâ Kăn xiâm chêh tơm xo rơkong Đảng cầm quyền Frelimo, teăng mâ mâu khu tê mơdró Mozambique.

Kăn xiâm phŏ hnê ngăn tơnêi têa tối nhên, Đảng, Tơnêi têa đi đo tơmâng troh pơlê pơla mơngế Việt Nam a kong têa ê, tung mê, ai kuăn pơlê pin a Mozambique; kheăn kơdeăn kuăn pơlê pin a Mozambique đi đo tơrŭm môi tuăn, rŭm dêi pó, tŏng kum dêi pó tơniăn tung tơdroăng rêh ối, mot rêh ối lĕm tung pơlê pơla kong têa vâi.