VOV4.Xơ Đăng -  Tơbâ 132 hơnăm hâi kot mâ pôa Hồ Chí Minh, kơxê lơ 19/5, a Tíu pêi cheăng kăn xiâm hnê ngăn tơnêi têa, jâ Võ Thị Ánh Xuân, kăn xiâm phŏ hnê ngăn tơnêi têa hiăng trâm 60 ngế droh rơtăm ki kơhnâ rơkê dêi Khô̆i Khu mơdró kâ Tơnêi têa. Kố cho mâu ngế ki kơhnâ rơkê teăng mâ ăm lối 100 rơpâu ngế đoan viên droh rơtăm Khu mơdró kâ Tơnêi têa tung tơdroăng tơ’noăng hriâm tâp ƀă pêi pro tiô troăng tơmiât mơno Hồ Chí Minh tung hneăng hơnăm 2020 – 2022.

Tơpui a rôh trâm mâ, jâ Võ Thị Ánh Xuân pơkâ thế Đoàn Khô̆i khu mơdró kâ Tơnêi têa mơdêk hnoăng cheăng hnê tối hên tơdroăng ki kal; rơhêng vâ mâu droh rơtăm ki kơhnâ rơkê châ khĕn kơdeăn pơtối mơdêk mau tơdroăng ki hiăng pêi pro, mơdêk hiâm mơno pôu râng hnoăng cheăng, ai tơmiât kân ƀă rơhêng vâ mơnhông vâ pơtối veăng kum ă khu mơdró kâ, grup pơkuâ ƀă tíu pêi cheăng nôkố dêi tơná, tơxâng cho mâu ngế ki djâ troăng ahdrối vâ đoân viên droh rơtăm pêi tiô ƀối.

Katarina Nga tơplôu ƀă tơbleăng