Phŏ Kăn xiâm hnê ngăn tơnêi têa hiăng troh a cheăm Pờ Y, tơring Ngọc Hồi, pơkuâ po Leh koh hlá cơ a tơneăn tâp hdró tíu tơkăng kong pơla Việt Nam – Lếo – Kul. Drêng kố, Phŏ Kăn xiâm hnê ngăn tơnêi têa diâp tơmeăm ăm kăn ƀô̆ lêng Đông mố đô̆i gâk tơkăng kong Bo cheăng Bờ Y, tơmâng xo mâu hnoăng ki kơdô mơeăm dêi khu lêng mố đô̆i gâk tơkăng kong tung rak vế hnoăng pơkuâ tơnêi tơníu ƀă gâk kring tơkăng kong tơnêi têa.

A Hngêi Mơhno túa lĕm tro tơrŭm tơroâ tơkăng kong pơla Việt Nam – Lếo – Kul a cheăm Pờ Y, tơring Ngọc Hồi, Phŏ Kăn xiâm hnê ngăn tơnêi têa hiăng diâp tơmeăm ăm 30 rơpŏng ki châ tơnêi têa gum, 30 rơpŏng kơtiê ƀă 30 ngế hdrêng ai tơdroăng rêh kâ ối pá puât. Tơpui ƀă kăn ƀô̆ kong pơlê Kon Tum ƀă kuăn pơlê cheăm Pờ Y, tơring Ngọc Hồi, jâ Võ Thị Ánh Xuân, Phŏ Kăn xiâm hnê ngăn tơnêi têa tơmâng xo tơdroăng ki veăng gum dêi Đảng ƀô̆, khu kăn pơkuâ, khu lêng ƀă kuăn pơlê kong pơlê Kon Tum tung tơplâ xâ xuân môi tiah tung rôh ki hiăng hơniâp lĕm mơjiâng pơlê cheăm tơnêi têa.