VOV4.Xơ Đăng - Drêng Hâi vâi hdrêng lâp plâi tơnêi lơ 1/6 ƀă Khế tŏng kum Xua vâi hdrêng 2022, jâ Võ Thị Ánh Xuân, kăn xiâm phŏ hnê ngăn tơnêi têa hiăng troh pôu ngăn mâu vâi hdrêng ki dế pơlât ŭm tung châ a Hngêi pơkeăng K (hngêi pơkeăng ki pro a Tân Triều, Hà Nội). Pôu ƀă diâp tơmeăm ăm vâi o kŭn, mâu rơpŏng dêi mâu vâi hdrêng ki tamo pơlât a Hngêi pơkeăng K Tân Triều, jâ Võ Thị Ánh Xuân tối mâu tơdroăng ki tơmâng, hiâm mơno hơ-ui ƀă mâu vâi o, mâu ngế ki dế pơlât akố.

Drêng Hâi Plâi tơnêi vâi hdrêng, kăn xiâm phŏ hnê ngăn tơnêi têa pơtroh rơkong rơkâu ivá troh mâu vâi hdrêng ki dế pơlât, malối cho vâi hdrêng ki ối kŭn, rơhêng vâ mâu vâi o pôi tá préa luâ râ, mơ-eăm pơlât, rĕng ‘mâi mơnhông ivá ƀă rĕng châ vêh ngi hngêi ƀă dêi rơpŏng. Kăn xiâm phŏ hnê ngăn tơnêi têa tối phiu ro drêng mâu kế tơmeăm xúa dêi hngêi pơkeăng rế hía rế krá kâk tâ vâ kum pơlât ăm mâu ngế châi tamo; tơdrêng amê hlối mơnhên tối khât mâu ivá mơ-eăm ôh tá la lâi pơtê dêi mâu ƀok thái pơkeăng vâ hên mâu tamo ŭm tung châ, malối cho vâi kơdrâi, vâi hdrêng, vâi kơdrâi dế mơ-êa kâi mơdon hâi khế rêh.

Katarina Nga tơplôu ƀă tơbleăng