Vâ chê 300 kăn teăng mâ cho khu râ kăn pơkuâ mâu khu cheăng, kơbong tơbleăng tơdroăng pơtâng tối tơdroăng kal ối tung Khu pơtâng tối tơdroăng kal khu râ kăn pơkuâ hnê ngăn cheăng Đảng kong pơlê, pơlê kong kơdrâm, đảng ủy ối tung tơnêi têa, mâu khu tơrŭm cheăng kal kí rêh ối pơlê pơla, mâu ngế tơbleăng tơdroăng kal mâu râ tung lâp tơnêi têa troh veăng.

Hneăng hôp mơdoh hên chôu tối tơdroăng chuyên đề ‘na tơdroăng ASEAN, tơdroăng châ tơƀrê mâu tơdroăng pêi cheăng tơpui kâ ƀă kong têa ê ki kal dêi khu râ kăn pơkuâ hnê ngăn Đảng, Tơnêi têa ƀă mâu troăng prôk kân dêi khu tơrŭm cheăng tơpui kâ ƀă kong têa ê tung la ngiâ.

Pôa Phan Xuân Thuỷ, Kăn phŏ pơkuâ pơtâng tối Tơnêi têa pơkâ thế tung la ngiâ, mâu Khu pơtâng tối tơdroăng kal mâu khu râ kăn pơkuâ hnê ngăn cheăng Đảng kong pơlê, pơlê kong kơdrâm, đảng ủy rơtế mâu ngế tơbleăng mâu râ tơkŭm pơtâng trâu rơdâ tung kăn ƀô̆, đảng viên ƀă mâu râ kuăn pơlê ‘na mâu tơdroăng châ tơƀrê ki kơnâ ƀă tơdroăng mơnhông dêi tơnêi têa; tơtrŏng tơdroăng pơtâng tối Pơkâ kơxô̆ 35 hâi lơ 14/6/2024 dêi Khu xiâm kal kí ‘na Hneăng hôp Đảng ƀô̆ mâu râ la ngiâ Hneăng hôp kăn teăng mâ lâp tơnêi têa roh má XIV dêi Đảng xuân kal châ mơjiâng pơkâ pêi tŭm vâ pơtâng tối, ki má lối cho tơdroăng tơmâng xo rơkong tơpui dêi kăn ƀô̆, đảng viên ƀă kuăn pơlê veăng hôp tơpui tơno mâu tơdroăng ki kal tơbleăng hneăng hôp.