Tiô tối a rôh hôp, mơhế ối trâm hên tơdroăng xơpá, la ƀă tơdroăng ki mơ-eăm dêi tâi tâng khu cheăng kal kí, kong pơlê Gia Lai xuân pơtối rak vế ki tơniăn. 14/21 tơdroăng pơkâ cheăng kâ rêh ối  pêi châ ƀă luâ pơkâ tâng vâ pơchông ƀă tơdroăng pơkâ. Rôh hôp kố, Hô̆i đong kong pơlê Gia Lai kô séa ngăn mâu tơdroăng chêh tơbleăng  pêi pro tung hơnăm 2023 ƀă mâu tơdroăng pơkâ vâ pêi troh hơnăm 2024 dêi Ngế xiâm ngăn Hô̆i đong kong pơlê, Vi ƀan kong pơlê.

Malối rôh hôp kô tơmâng xo hlá phĭu ki pôk ƀă mâu kăn ki châ Hô̆i đong kong pơlê rah xo;  kơ-êng ƀă tiâ tơdroăng kơ-êng tiô pơkâ. Tơbleăng a rôh hôp, pôa Y Thanh Hà Niê kơdăm - Kăn xiâm hnê ngăn Hô̆i đong hnê kuăn ngo dêi Kuô̆k hô̆i púi vâ Hô̆i đong hnê ngăn kong pơlê Gia Lai pơtối mơ-eăm, tơbleăng pêi châ tơƀrê mâu tơdroăng mơnhông cheăng kâ - rêh ối; tah ki pá puât tung pêi mâu tơdroăng cheăng, tơkŭm pêi 3 tơdroăng pơkâ dêi tơnêi têa; Hnê mơhno kơtăng tơdroăng xo liăn ngân ‘no mơjiâng tơmeăm khoăng tơnêi têa.