A rôh hôp, hên kuăn pơlê pêi chiâk kơ-êng kăn pơkuâ kong pơlê Dak Nông, tơdroăng ki xiâm tơkŭm ki hên ‘na mâu tơdroăng ki xơpá tung kơxô̆ liăn ‘no pêi cheăng, troăng hơlâ ăm mung, troăng hơlâ tơnêi tơníu, hnoăng cheăng túa pơkâ pêi, tơdroăng ki tơrŭm 4 khu vâ ‘mâi rơnêu tơdroăng ki châ hên kế tơmeăm la tê ôh tá ai yă, tê ai yă la ôh tá châ hên kế tơmeăm”.

Tối tơdrêng ăm kuăn pơlê, pôa Hồ Văn Mười, kăn hnê ngăn Vi ƀan kong pơlê Dak Nông ăm ‘nai, mâu hơnăm hdrối nah, pêi chiâk deăng dêi kong pơlê hiăng mơnhông tơniăn tâi tâng, pơtối cho hnoăng cheăng 1 tung 3 tơdroăng ki xiâm ‘na cheăng kâ. Tơdrêng amê hlối tối nhên, kong pơlê pơtối tơkŭm pơkuâ, hnê mơhno tơbleăng tơdâng tơ’mô mâu hnoăng cheăng, troăng hơlâ, séa ngăn, tí tăng ‘nâi plĕng, rơnêu, ‘mot tơ’nôm mâu troăng hơlâ tŏng kum xơpá, tơvâ,, pro tơ’lêi hlâu, mâu kơxô̆ liăn, tơdroăng ki tơ’lêi hlâu pơxúa mơhnhôk ‘no liăn cheăng tŏng kum kuăn pơlê pêi chiâk, khu pêi cheăng tơrŭm mơnhông.