VOV4.Xơ Đăng - A hneăng hôp ‘na Tơbleăng pơkâ dêi Ngế xiâm pơkuâ Kŏng an tơkŭm po a kơ koan Kŏng an kong pơlê Gia Lai, Đăi tă Lê Văn Hà – Kăn phŏ pơkuâ Kŏng an kong pơlê châ rah xo pêi cheăng a Khu xiâm pơkuâ Kan sát troh lâp lu (ối tung Khu xiâm pơkuâ Kŏng an), to pro Kăn phŏ pơkuâ hnê mơhno.

Kăn phŏ pơkuâ Kŏng an kong pơlê Gia Lai châ rah xo pro Kăn phŏ hnê mơhno Kan sát troh lâp lu

Đăi tă Lê Văn Hà nah cho Kăn phŏ pơkuâ kơ koan xiâm pơkuâ ngăn ‘na kih thuât, Khu xiâm pơkuâ Kan sát troh lâp lu (Khu xiâm pơkuâ Kŏng an). Khế 11/2018, pôa Hà châ Khu xiâm pơkuâ kŏng an rah xo pro Kăn phŏ pơkuâ Kŏng an kong pơlê. Tơdroăng pêi cheăng a Gia Lai, Đăi tă Lê Văn Hà hiăng hbrâ hriăn plĕng, xúa mâu pơkâ, hnê mơhno mâu tíu cheăng kêi đeăng tơtro tâi tâng hnoăng cheăng châ pơcháu. Mâu tơdroăng châ tơƀrê tung pêi cheăng dêi Đăi tă Lê Văn Hà hiăng châ khu râ kăn pơkuâ Khu xiâm Kŏng an, kơ koan Kŏng an ƀă Tĭnh ŭy, Viƀan kong pơlê Gia Lai mơnhên, kheăn kơdeăn păng ‘nâng.