VOV4.Xơ Đăng - Kơxê măng lơ 25/5, a Hngêi Kuô̆k hô̆i, Kăn pơkuâ Đảng ƀă Tơnêi têa trâm mâ Kăn teăng mâ Kuô̆k hô̆i cho mơngế hdroâng kuăn ngo hneăng 15. Xông tơpui a roh trâm mâ, pôa Vương Đình Huệ, Kăn xiâm hnê ngăn Kuô̆k hô̆i tối rơdêi, Đảng ƀă Tơnêi têa đi đo môi tuăn mơnhên tơrŭm tâi tâng mâu hdroâng kuăn ngo cho kal khât ƀă tơnêi têa pin, môi tơnêi têa môi tuăn dêi 54 hdroâng kuăn ngo nhŏng o rơtế rêh ối, đi đo môi tuăn tơdroăng mơjiâng troăng hơlâ rŭm tâi tâng hdroâng kuăn ngo, ing xiâm rêi tơdâng tơ’mô, rŭm môi tuăn, nhuô̆m dêi pó ƀă kum dêi pó rơtế mơnhông mơdêk.

Kăn pơkuâ Đảng ƀă Tơnêi têa trâm mâ Kăn teăng mâ Kuô̆k hô̆i cho mơngế hdroâng kuăn ngo hneăng má 15

Pôa Vương Đình Huệ, Kăn xiâm hnê ngăn Kuô̆k hô̆i pói vâ mâu kăn teăng mâ Kuô̆k hô̆i cho mơngế hdroâng kuăn ngo tơmâng troăng pơkâ pêi, troăng hơlâ tơniăn pêi pro châ tơƀrê mâu troăng pơkâ pêi, troăng hơlâ dêi Tơnêi têa a kong ngo, tơkăng kong, kơpong vâi krâ hdroâng kuăn ngo; tơkŭm mơjiâng kơpong hdroâng kuăn ngo ƀă kong ngo mơnhông rĕng cheăng kâ, mơhno túa lĕm tro, rêh ối pơlê pơla, ó rơdêi ‘na gak kring, cheăng lêng, mot tơrŭm ƀă tơdroăng mơnhông mơdêk tơdjuôm dêi lâp tơnêi têa, tơxâng ƀă tíu cheăng ton xŏn ki kal má môi dêi tơnêi têa.

A Sa Ly tơplôu ƀă tơbleăng