Tối nhên, kơpong Tây Nguyên ai hnoăng cheăng tung la ngiâ, cho hngêi Đông Dương, Kăn xiâm hnê ngăn tơnêi têa pơkâ thế Ƀinh đoân 15 pơtối pơkâ kơtăng trâu hơngế túa tơmiât, troăng hơlâ na lêng gâk kring dêi Đảng, Khu pơkuâ ngăn Đảng lêng Tơnêi têa, Khu xiâm pơkuâ ngăn lêng, ‘nâi nhên Tơdroăng cheăng tung la ngiâ rak vế Tơnêi têa tung tơdroăng nôkố, Pơkâ dêi Khu xiâm pơkuâ tơdroăng kal kí  ‘na túa tơmiât mơnhông cheăng kâ rêh ối pơlê pơla ƀă rak vế pơlê pơla, gak kring kơpong Tây Nguyên troh hơnăm 2030, hnoăng cheăng pêi troh hơnăm 2045.

Tơrŭm krá rơdêi ƀă khu pơkuâ hnê ngăn Đảng, kăn pơkuâ ƀă kuăn pơlê a kong pơlê vâ pêi pro mâu hnoăng cheăng mơnhông cheăng kâ rêh ối pơlê pơla; rak vế hnoăng cheăng djâ troăng ahdrối tung pêi pro mâu hnoăng cheăng dêi kong pơlê tíu pêi cheăng lêng.

Khế 8/2023, Ngế pro xiâm hnê ngăn tơnêi têa Phạm Minh Chính pêi cheăng ƀă Khu pơkuâ hnê ngăn cheăng Đảng kong pơlê Kon Tum ‘na tơdroăng pêi pro hnoăng cheăng mơnhông cheăng kâ – rêh ối pơlê pơla. Ngế pro xiâm hnê ngăn tơnêi têa Phạm Minh Chính kheăn kơdeăn tơdroăng mơ-eăm ƀă kheăn kơdeăn păng ‘nâng tơdroăng châ tơƀrê dêi Đảng ƀô̆, khu râ kăn pơkuâ, lêng ƀă kuăn pơlê kong pơlê Kon Tum.

Tung la ngiâ Ngế pro xiâm hnê ngăn tơnêi têa pơkâ thế Kon Tum mơnhông mơdêk rĕng, rơdêi, krá tơniăn tâ ƀă khŏm ôh tá ăm kơdrâ ‘na gâk kring tơniăn kal kí. Mơjiâng kơpong ‘na hbrâ troăng tơrŭm cheăng kâ lâp plâi tơnêi, tơdâng tơ’mô, lĕm rơdêi, châ tơƀrê ƀă thế rak vế mơnhông khôi túa lĕm hdroâng kuăn ngo.

Ngế pro xiâm hnê ngăn tơnêi têa pơkâ thế la ngiâ kal tơkŭm kơjo vêh séa ngăn mâu pơkâ, hnoăng cheăng vâ tơkŭm pơkuâ hnê mơhno, mơngế pêi pro châ tơƀrê, hơnăm kơ’nâi hên tâ hơnăm hdrối ƀă mơ-eăm ƀă tơkâ hluâ mâu pơkâ mơ’no.