VOV4.Xơ Đăng - Hâi lơ 24/4, Khu râ kăn pêi cheăng dêi Khu hnê mơhno má môi tơdroăng cheăng Đảng kong pơlê Dak Lak xua pôa Nguyễn Đình Trung, Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê pơkuâ djâ hiăng troh séa ngăn tíu ko loăng ƀă hnê mơhno séa ngăn, pơxâu phak roh ko ‘nhê kong kân vâ chê 400 ha kong a cheăm Ya Tờ Mốt, tơring Ea Súp.

Kăn pơkuâ hnê ngăn Đảng kong pơlê Dak Lak séa ngăn, hnê mơhno tơdroăng séa ngăn roh ko ‘nhê vâ chê 400 ha kong

Akố, kăn pơkuâ kong pơlê Dak Lak hiăng tơmâng khu cheăng tơbleăng tơdroăng roh ko ‘nhê kong. Rơtế amê, khu râ kăn pêi cheăng xuân lăm kơ-êng, diâp kơxuô tơmeăm mơhnhôk mâu kăn ƀô̆, mâu kŏng an ƀă khu ki ê dế pêi hnoăng cheăng. Pôa Nguyễn Đình Trung pơkâ thế khu cheăng thâ pêi kêi đeăng khăm ngăn tíu ko loăng vâ rĕng tơkŭm po xăm tối pơtối. Tơdrêng amê, thế mơnhên hnoăng cheăng, tơleăng mâu ngế krê, khu pú hên ki tơdjâk.

A Sa Ly tơplôu ƀă tơbleăng