Tơpui a rôh tơdah, pôa Athsaphangthong Siphandone tối ôh ti kâi piu ƀă ivá mơnhông rơdêi dêi Pơlê kong xiâm Hà Nội ‘na mâu kơvâ cheăng tung pơla hdrối nah. Tơdrêng amê, hlối tối mâu tơdroăng ‘na mơnhông mơdêk cheăng kâ reh ối Pơlê kong xiâm Viêng Chăn, ngế xiâm pơkuâ pơlê kong xiâm ăm ‘nâi, cheăng kâ pơlê kong kân châ mơdêk 4,4%, ƀă kơxô̆ liăn pêi lo rêm ngế lối 5.500 dollars tung môi hơnăm.

Bu tung 9 khế dêi hơnăm kố, Viêng Chăn hiăng pêi klêi tâi tâng mâu tơdroăng ki nâp hrê liăn ngân, tơmiât troh kơlo ki tơkâ luâ dâng 20% tung hơnăm kố. Pôa Đinh Tiến Dũng, kăn pơkuâ ngăn Đảng pơlê kong kân Hà Nội pơkâ thế Pơlê kong xiâm Viêng Chăn séa ngăn tơdroăng ki chêh bro hlá mơ-éa tơkêa tơrŭm cheăng pơla péa Pơlê kong xiâm tung pơla hdrối nah, tơdrêng amê hlối pơkâ thế mâu pơlê klrâm, tơring pơtối tơbleăng tơrŭm rơdêi ƀă tơƀrê tâ. Tơdrêng amê hlối tối nhên, tơrŭm cheăng pơla Hà Nội ƀă Viêng Chăn athế mơ-eăm chiâng pơlê kong xiâm djâ troăng ahdrối tung tơrŭm cheăng pơla mâu kong pơlê Việt Nam – Lếo, veăng kum pơxúa tung tơrŭm cheăng pơla péa Đảng, péa tơnêi têa.