VOV4.Xơ đăng - Drêng tơbâ 132 hơnăm Hâi kot mâ Pôa Hồ Chí Minh, Kăn xiâm hnê ngăn tơnêi têa pin ki apoăng hâi lơ (19/5/1890 - 19/5/2022) ƀă 111 hơnăm Hâi Pôa Hồ lăm tăng troăng tŏng xo tơnêi têa (5/6/1911-5/6/2022), kơxo lơ 18/5 kăn pơkuâ Pơlê kong kân Hồ Chí Minh xua pôa Nguyễn Văn Nên, Ngế cheăng tung Khu xiâm pơkuâ tơdroăng kal kí, Kăn pơkuâ ngăn Đảng Pơlê kong kân Hồ Chí Minh pro kăn xiâm pơkuâ djâ khu kăn kố hiăng troh têk nhang, pleăng reăng tơbâ Pôa Hồ Chí Minh.

Kăn pơkuâ Pơlê kong kân Hồ Chí Minh chôu nhăng, pleăng reăng ăm pôa Hồ Chí Minh

A Tíu ‘măn rak kế tơmeăm Hồ Chí Minh – Tíu ki mơjiâng pro a Pơlê kong kân Hồ Chí Minh, khu kăn kố hiăng pleăng reăng, chôu nhăng tơbâ Hồ Chí Minh. Mâu kăn mơdoh chôu tơbâ troh hnoăng cheăng kân kĭn dêi pôa Hồ Chí Minh, ngế kăn pơkuâ dêi Đảng ƀă kuăn pơlê pin, Ngế thái khên tơnôu dêi Kăch măng Việt Nam, ngế ngoh ki tơleăng hdroâng mơngế, ngế ki rơkê ‘na tơdroăng mơhno túa lĕm tro a kong têa ê, Ngế lêng kŏng san kong têa ê djâ troăng a hdrối hiăng pleăng dêi plâ rơxông tơná ăm tơdroăng cheăng kăch măng dêi Đảng, dêi hdroâng kuăn ngo.

Katarina Nga tơplôu ƀă tơbleăng