VOV4.Xơ Đăng - Rơtế [a\ hnoăng cheăng tơplâ mơdât mâu ngế xôi, mâu ngế Kan sát cơ đo#ng, Ko\ng an kong pơlê Dak Lak đi đo tơku\m po mâu tơdroăng tơmiât troh tíu pêi cheăng, kum kuăn pơlê tung pêi cheăng pêt mơjiâng tơmeăm khoăng, pôe xo tơmeăm pêi lo ing chiâk deăng. Mâu tơdroăng kố hiăng kum thăm pêng păm tơdroăng tuăn pâ tơru\m môi tuăn khu lêng kuăn pơlê, pro ăm i le\m um méa lêng ko\ng an kuăn pơlê [a\ kuăn pơlê a mâu pơlê.

A [uôn Ktơng Drun, cheăm Čư Nĕ, tơring Krông {uk, kong pơlê Dak Lak, 30 ngế kŏng an dế thâ po troăng cho mơ’no têa brông ƀă trâ văng nhâ êa rơtoh, ‘mâi rơnêu kơneăng têa. Thươ̆ng ŭy Nguyễn Thị Khánh Vân, Kăn phŏ hnê ngăn Đoân Droh rơtăm dêi Ƀơrô kăn sát cơ đŏng Kŏng an kong pơlê Dak Lak ăm ‘nâi, mâu roh lăm prôk pa gong xua kuăn pơlê đi đo châ tíu pêi cheăng tơbleăng vâ kum kuăn pơlê a mâu pơlê.

“Kố cho môi tung mâu tơdroăng cheăng pêi ki ngin mâu hơnăm ối nếo ai ivá pêi ƀă mơhnhôk mâu hơnăm ối nếo pêi cheăng kum kuăn pơlê, tơbleăng mơhno mâu tơdroăng cheăng dêi kăn sát kuăn pơlê, mâu lêng kŏng an kuăn pơlê troh mâu kơpong hơngế hơngo, mâu kơpong kơtiê xơpá”.

Chât ngế lêng cơ đŏng kui tah trâp drô thông cho mơ’no têa

Tung rôh kố, mâu lêng kô kui trâp drô thông têa kui châ 300m thông têa, klêi mê trâ văng nhâ êa, po nhâ kơpuih văng hngêi kuăn pơlê tơkŭm hôp a 2 to pơlê, buôn Drao ƀă Ktơng Drun, cheăm Čư Né; tơrŭm hlối hnê tối ‘’na luât ƀă mơhnhôk tăng liăn ăm 50 kơxu tơmeăm ăm mâu rơpŏng hngêi kơtiê xơpá.

Pôa Y Bliu Mlô, kăn phŏ hnê ngăn Vi ƀan Măt trâ̆n Tơnêi têa cheăm Čư Nĕ, kô cho 2 pơlê xơpá má môi a cheăm ƀă vâ chê 500 rơpŏng, 2.000 pơ’leăng mâ mơngế, ki hên cho mơngế Rơđê rêh ối. Tơdroăng veăng kum, hnê tối teăm tơdrêng dêi mâu kăn ƀô̆ mâu lêng kum kuăn pơlê kơdroh xơpá, mơ-eăm mơnhông mơdêk.

“Tơdroăng rêh ối dêi kuăn pơlê nôkố tối tơchoâm pêi chiâk pêi deăng xơpá khât. Ing rôh hbruô tơmeăm mê púi vâ kuăn pơlê pin kô mơ-eăm vâ pêi klâng, chiâk. Teăng mâ ăm kuăn pơlê péa pơlê hâk phiu, mơnê púi vâ cho pơtối hnê, kum kuăn pơlê, malối tung tơdroăng nôkố’’.

Ƀă rêm ngế lêng kăn sát cơ đŏng, rêm rôh lăm pá kong cho môi rôh ki vâ vâi châ vêh ƀă pơlê pơla, achê ƀă kuăn pơlê, hnê tối ăm kuăn pơlê ‘nâi mâu tơdroăng.

Kăn sat cơ đŏng hbruô tơmeăm ăm kuăn pơlê ki xơpá

Trung sih Y Sen Mdrang tối:

“Ing mâu rôh lăm pêi cheăng mê ngin pro chiâng ai tơdroăng tơrŭm hmâ khât ƀă kuăn pơlê, rơtế hmâ ƀă rơtế ƀă dêi rơpó tối ‘na tơdroăng rêh ối tiô hmâ dêi kuăn pơlê. Trâm mâ kuăn pơlê tâ hmiân tuăn tâ, vâ kum kuăn pơlê ƀă tâi tâng hiâm mơno, tá tuăn tơmiât vâ pêi dêi mơngế lêng’’.

Thiê̆u tă Hoàng Thị Kim Phượng, Đô̆i trương Đô̆i chính trĭ ngăn ‘na pơchên kế kâ, Ƀơrô kăn sát cơ đông ăm ‘nâi, pêi pro tiô tơdroăng mơhnhôk ‘’Kŏng an Dak Lak’’  lăm pêi cheăng a mâu cheăm pơlê, mơjiâng tơrŭm krá tơniăn lĕm ƀă kuăn pơlê’’, rêm hơnăm tíu pêi cheăng tơkŭm po hên tơdroăng cheăng pêi a pơlê  cheăm pleăng hnoăng cheăng xua kuăn pơlê.

Rêm rôh lăm pêi cheăng ‘nâ hía ton châ măng tĭng, mâu lêng kô lăm troh a pơlê pro đông, pêi cheăng kum kuăn pơlê. Môi tiah tung hơnăm 2021, mơhé pơreăng COVID-19 tâ tú rơ-iô, tíu pêi cheăng xuân tơkŭm po 7 rôh lăm pêi cheăng, mơhnhôk châ lối 320 rơtuh liăn vâ kum rôe tơmeăm hbru ăm kuăn pơlê. Krê ing apoăng hơnăm troh nôkố, tíu pêi cheăng hiăng tơkŭm châ 5 tơdroăng cheăng pêi lăm pêi a mâu pơlê cheăm hngế hơngo kơtiê xơpá.

“ ‘Nâi nhên ki kal vâ mơjiâng tơrŭm môi tuăn pơla mâu lêng ƀă kuăn pơlê tung kong pơlê rêm hơnăm Ƀơrô kăn sát Cơ đŏng hiăng hnê mơhno ăm mâu kăn ƀô̆, mâu lêng tơbleăng mâu tơdroăng cheăng ki pleăng hnoăng tơná, pleăng dêi tơná lăm pêi cheăng a cheăm pơlê, kum kuăn pơlê, malối cho kơpong kuăn ngo, kơpong hgế hngo. Ing mâu rôh pêi cheăng mê u ối tung rêm ngế kăn ƀô̆, mâu lêng ngin, a hlo mâu tơdroăng xơpá, tơvâ tơvân dêi kuăn pơlê ƀă môi iâ kô veăng ‘no kum mơnhông tơdroăng rêh ối ăm kuăn pơlê’’.

Hdrối mê, 50 ngế kăn ƀô̆ mâu lêng Ƀơrô kăn sát cơ động, kong pơlê Dak Lak xuân hiăng pêi pro ‘’lăm pleăng hnoăng cheăng a cheăm Yang Tao, tơring Lăk’’. Tơdrêng ƀă tơkŭm lăm séa ngăn, tí tăng ngăn rak tơniăn, prop tơniăn troăng prôk tung cheăm, mâu kăn sát cơ động hiăng tơkŭm hnê mơhnhôk mâu lêng kuăn pơlê rak tro luât tiô troăng pơkâ dêi Đảng luât tơnêi têa ƀă tŭm tơdroăng pơkâ dêi mâu kăn cheăm pơlê. Akố, mâu lêng kăn sát cơ đŏng hiăng kơpuih văng lê̆m hyôh kong prâi a mâu troăng kân; lo a klâng kum kuăn pơlê pôa báu.

Tung pơla iâ hâi vâ mâu ngế pleăng hnoăng cheăng troh ƀă kuăn pơlê dêi mâu pơlê mâu kăn ƀô̆ mâu lêng kăn sát cơ đŏng đi đo tơmâng kô ôh tá xâu pá puât vâ rơtế ƀă veăng pêi tơdroăng cheăng kum kơdroh iâ tơdroăng cheăng a thôn pơlê ki hên cho mâu kuăn ngo ki ối kơtiê xơpá.

Mâu rôh lăm pêi cheăng a mâu pơlê dêi mâu lêng kan sát cơ đŏng a Dak Lak hiăng kum rak tơniăn, rơtế tơrŭm krá tâ hiâm tuăn dêi mâu lêng ƀă kuăn pơlê, mơjiâng um méa, mơhno tơdroăng ki le\m ‘na mơngế lêng Kŏng an kuăn pơlê ‘’Xua tơnêi têa piu dêi tơná, xua kuăn pơlê pêi cheăng vâ kum kuăm pơlê’’.

H’Xíu H’Mok chêh

Gương tơplôu ƀă tơbleăng