Xông tơpui a Hneăng hôp tơpui tơno, pôa Vương Đình Huệ, Kăn xiâm hnê ngăn Kuô̆k hô̆i kheăn kơdeăn, tơrŭm cheăng Việt Nam – Iran kố rế hía rế mơnhông mơdêk lĕm mơhno ing 3 tơdroăng: ăm tơdroăng tuăn pâ ƀă tơdroăng ki nhuô̆m dêi pó; mơnhông mơdêk hên tơdroăng ing kal kí, tơpui kâ ƀă kong têa ê troh cheăng kâ, tê mơdró, khôi túa lĕm tro; péa pâ rơtế tơrŭm cheăng hên, tŏng kum dêi pó tung mâu hneăng hôp tơpui tơno hên pâ.

Kăn xiâm hnê ngăn Kuô̆k hô̆i pơkâ thế, péa pâ kal mơdêk mâu khu tơdroăng pêi cheăng ‘na tơpui tơno tê mơdró, chêl liăn. Kăn xiâm hnê ngăn Kuô̆k hô̆i loi tơngah, mâu tơdroăng pá puât a ngiâ ƀă tá tơdroăng ki ton xŏn ăm tơrŭm cheăng dêi khu tê mơdró péa tơnêi têa kô châ tơleăng chôa ‘lâng châ tơƀrê, kum trut rĕng tơdroăng mơnhông cheăng kâ, rêh ối pơlê pơla, veăng kum tung tơdroăng châ tơƀrê tơdjuôm dêi tŭm péa tơnêi têa.