Veăng hôp ƀă tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i pơchân, Hô̆i đong hnê ngăn pơlê kong kân Hà Nội pơtối mơdêk hiâm mơno pơhlêh nếo tung cheăng, athế đi đo cho “ngế ki pêi pro tro tơƀrê djâ troăng ahdrối” dêi Hô̆i đong hnê ngăn mâu kong pơlê, pơlê kong kân tung lâp tơnêi têa.

Pơhlêh nếo túa tơmiât tung pơla mơjiâng pro luât, mơdêk ki rơkê plĕng, tơƀrê tung séa ngăn, pơkâ mâu tơdroăng ki kal ối tung hnoăng pơkuâ. Kăn xiâm hnê ngăn Kuô̆k hô̆i tối tiah kố, Hneăng hôp rôh kố dêi Hô̆i đong hnê ngăn pơlê kong kân kô cho Hneăng hôp dêi ivá hâk tơngăm nếo, dêi hiâm mơno pơhlêh nếo, pro ivá mơnhông tơƀrê nếo, teăm tŏng gum tơdrêng mâu tơdroăng xơpá, pro tơ’lêi hlâu ‘na liăn ngân, tơkŭm mơnhông cheăng kâ rêh ối pơlê pơla, rak tơniăn tơdroăng cheăng lêng, gâk kring ƀă mơdêk tơdroăng rêh ối dêi kuăn pơlê Pơlê kong xiâm, veăng gum tơƀrê tung hnoăng cheăng pơhlêh nếo, mơnhông rơdêi dêi tơnêi têa tung chal ki nếo.

Tiah mê, Hà Nội kal tơkŭm kơjo ‘na liăn ngân, pro ivá mơnhông rơdêi tâ nếo ‘na tơdroăng pro tơdâng tơ’mô, rơkê plĕng ƀă rơkê tiô chal nôkố, tơrŭm tơdjêp; tơkŭm pơkuâ ngăn tro ƀă mâu túa pơkâ tơbleăng pêi tung mâu kơvâ cheăng kâ, túa lĕm tro, rêh ối ƀă hên ki ê.