Veăng roh tơdạ Kăn xiâm hnê ngăn Kuô̆k hô̆i Bulgaria a Đăi hok Kuô̆k ya Hà Nội ai Kăn xiâm phŏ hnê ngăn Kuô̆k hô̆i, Kăn pơkuâ Viƀan tơpui kâ Kuô̆k hô̆i, Kăn xiâm phŏ pơkuâ Viƀan tơpui kâ ƀă kong têa ê. A roh tơdah, Kăn pơkuâ Đăi hok Kuô̆k ya Hà Nội Lê Quân tối hâk ro drêng châ tơdah Kăn xiâm hnê ngăn Kuô̆k hô̆i tơnêi têa Kŏng hoa Bulgaria rơtế khu râ kăn xiâm hiăng troh lăm pôu ƀă trâm mâ tơpui tơno giảng viên, sinh viên hngêi trung.

Ƀă khôi túa tơrŭm cheăng lĕm tro dêi péa tơnêi têa, Kăn pơkuâ Lê Quân loi tơngah Đăi hok Kuô̆k ya Hà Nội ƀă mâu đăi hok dêi tơnêi têa kŏng hoa Bulgaria kô ai roh tơpui tơno, tơrŭm trâu hơhngế tâ nếo tung kơvâ hnê hriâm, hnê mơjiâng tuăn ngôa rơkê, hriăn plĕng khoa hok, kố xuân cho mâu tơdroăng ki xiâm má môi ăm tơrŭm cheăng krá tơniăn pơla péa tơnêi têa. Kăn xiâm hnê ngăn Kuô̆k hô̆i Bulgaria pơtroh rơkong koh troh khu pơkuâ rơtế sinh viên Đăi hok Kuô̆k ya Hà Nội ƀă tơpui tối ‘na tơdroăng pơxá ‘’Tơrŭm cheăng pơla péa pâ pơla Bulgaria ƀă Việt Nam ing mâ nhĕng mâu rơxông cheăng kâ ƀă khôi túa lĕm tro’’.