VOV4.Xơ Đăng - Tung rôh lăm pôu păng ‘nâng troh a kong têa Lếo, kơxê lơ 17/5, pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn xiâm Kuô̆k hô̆i tơnêi têa pin hiăng troh pôu Hngêi trung hdroâng kuăn ngo ai tíu kâ koi, ối pơtê kong pơlê Champasak. Hngêi trung phôh thong hdroâng kuăn ngo ai tíu kâ koi, ối pơtê dêi kong pơlê Champasak cho môi tung mâu hngêi trung, cho tơ-meăm diâp dêi Chin phuh ƀă kuăn pơlê Việt Nam ăm Chin phuh ƀă kuăn pơlê Lếo.

Hngêi trung phôh thong hdroâng kuăn ngo ai tíu kâ koi, ối pơtê dêi kong pơlê Champasak châ mơjiâng pro a hơnăm 1999, troh nôkố, hngêi trung kố hiăng veăng kum hnê ăm hên kuăn ‘nĕng châ hriâm, malối tơtrŏng troh tơdroăng ki hriâm nâl Xuăn.

Hngêi trung hdroâng kuăn ngo kong pơlê Champasak nôkố ai lối 900 ngế hok tro hriâm, ối tung 14 to hdroâng kuăn ngo. Pôa Vương Đình Huệ, kăn xiâm hnê ngăn Kuô̆k hô̆i ăm ‘nâi, péa Đảng, péa tơnêi têa kơjo kum tơkŭm hên mâu kơxô̆ liăn ăm hnoăng cheăng hnê hriâm, hnê ƀă mơdêk mâu ngế pêi cheăng, vâ pêi pro châ tơdroăng rơhêng vâ dêi hneăng ki nếo. ‘Na tơdroăng ki pơkâ thế dêi hngêi trung mơdêk liăn hriâm rơkê, pơtối tŏng kum, hnê hriâm, roê kế tơmeăm xúa tung hnê ƀă hriâm ăm hngêi trung. Pôa Vương Đình Huệ, kăn xiâm hnê ngăn Kuô̆k hô̆i tơmâng xo ƀă pơcháu ăm kăn teăng mâ dêi Việt Nam a Lếo rơtế ƀă mâu kơ koan tung Vi ƀan Tơrŭm cheăng Chin phuh hriăn ngăn vâ rế hía rế pơkâ tơleăng.

Drêng kố, pôa Vương Đình Huệ hiăng diâp tơmeăm ăm mâu hok tro ki hriâm rơkê tiếng Việt dêi hngêi trung; Hbru tơmeăm ăm hngêi trung mơéa, kế tơmeăm xúa tung hngêi trung hriâm kơnâ 230 rơtuh liăn.

Katarina Nga tơplôu ƀă tơbleăng