Lăm pôu, hlối hbru tơmeăm ăm mâu lêng rong tâ, châi tamo râ ki má 1/4 dêi 15 to kong pơlê, Pơlê kong kân tung lâp tơnêi têa dế pơlât a Tíu xiâm pơlât ngăn, pôa Trần Thanh Mẫn tối tơdroăng tơmâng tŏng gum ăm mâu ngế ai hnoăng tơnêi têa, mâu lêng rong râ, rơpŏng ai on veăng kuăn ‘nĕng hlâ xua tơplâ đi đo châ Đảng ƀă Tơnêi têa mơnhên cho hnoăng cheăng pêi ki kal, mơhno tơdroăng  ki lĕm “Khoh niân tiah hâi kố kơnôm ai hnoăng vâi krâ nah” dêi hdrông mơngế.

Pôa Trần Thanh Mẫn, Kăn xiâm hnê ngăn Kuô̆k hô̆i pâ thế tung la ngiâ, râ ủi, mâu kăn Pơlê kong kân Hồ Chí Minh pơtối tơmâng mơjiâng nếo, ‘mâi rơnêu bro hngêi tuăn pâ, ing kơxô̆ liăn kơdĭng, kum ai cheăng pêi, tơkŭm khăm, xoăng pơkeăng tê kơtê ƀă ăm mâu tơmeăm xúa tung pơlât mê cho rơxế króu, kơmăi kơjo tơmâng ăm mâu ki klêk tuăn la ai hnoăng tơnêi têa, vâ mơnhông tơdroăng rêh ối dêi mâu rơpŏng kơtiê ki  ai hnoăng tơnêi têa.