Tơbleăng a rôh pơxiâm po, pôa Trần Thanh Mẫn - Kăn xiâm hnê ngăn Kuô̆k hô̆i tối nhên tơdroăng rah iâ mơngế pêi cheăng ăm tơnêi têa rôh kố thế cho tơdroăng pơ’lêh rơdêi khât, tơdroăng xing xoăng pro tơniăn mơngế cheăng ăm tơnêi têa thế “Iâ mơngế - Cheăng rơdêi- Tơƀrê - Ƀeăn rơkê - Ai pơxúa” ôh tá rah xing xoăng tiô tuăn vâ dêi tơná, mê athế  pêi tro tiô troăng pơkâ dêi Tíu xiâm pro troăng a hdrối ƀă kong pơlê pêi ƀối.

Klêi tơ’mot tơdjuôm,  rah roăng iâ mơngế ki rơkê, tiô tối hdrối kơxô̆ mơngế pêi cheăng a mâu kơ koan dêi Kuô̆k hô̆i, kơ koan Vi ƀan pơkuâ cheăng Kuô̆k hô̆i, mâu tíu pêi cheăng dêi Ƀơrô Kuô̆k hô̆i kô kơdroh lối 30%.

Pôa Trần Thanh Mẫn - Kăn xiâm hnê ngăn Kuô̆k hô̆i pơkâ thế mâu kăn veăng hôp tơkŭm ăm hnê tối nhên a tơrêm tơdroăng dêi tơdroăng chêh tung hlá mơ-éa hriâm tơdjuôm ăm hnê tối a tơrêm tơdroăng dêi hlá mơ-éa chêh pơtroh, tơbleăng, pêi klêi tơdroăng tơbleăng ăm Đảng Đoân Kuô̆k hô̆i ăm hnê tối, vâ teăm tơbleăng ăm Khu xiâm Kal kí tro hâi khế  pơkâ hdrối hâi lơ 31/12/2024.