Kơxo lơ 21/8, pôa Stéphanie D’Hose, Kăn xiâm hnê ngăn Kuô̆k hô̆i râ má môi kong têa Ƀih rơtế babw khu râ kăn teăng mâ kong têa Ƀih hiăng troh a tơraih tơƀai Nội Bài (Hà Nội), pơxiâm roh lăm pôu pêi cheăng Việt Nam sap hâi lơ 21 – 25/8/2023 tiô rơkong krếo thế dêi pôa Vương Đình Huệ, Kăn xiâm hnê ngăn Kuô̆k hô̆i.

Việt Nam ƀă kong têa Ƀih mơjiâng tơrŭm tơpui kâ hơnăm 1973. Sap ing mơjiâng tơrŭm tơpui kâ, tơrŭm cheăng tiô khôi vâi krâ nah ƀă tơrŭm lĕm tro pơla péa tơnêi têa dế pơtối mơnhông mơdêk châ tơƀrê. Kăn xiâm hnê ngăn Kuô̆k hô̆i râ má môi kong têa Ƀih pôa Stéphanie D’Hose cho kăn ki râ kân xiâm má môi dêi Ƀih lăm pôu Việt Nam tung hơnăm 2023.

Kố cho roh péa tơnêi têa leh tơbâ 50 hơnăm Hâi mơjiâng tơrŭm cheăng tơpui kâ (22/3/1973 – 22/3/2023) ƀă 5 hơnăm Khu tơrŭm cheăng ton xŏn tung kơvâ pêi chiâk deăng. Roh lăm pôu pêi cheăng mơhno tơdroăng ki nhuô̆m dêi khu râ kăn pơkuâ kong têa Ƀih tung tơrŭm ƀă Việt Nam ƀă pơtối roh lăm pôu pêi cheăng dêi pôa Vương Đình Huệ a khế 9/2021.

Roh lăm pôu pêi cheăng vâ mơdêk tơrŭm cheăng kâ, tê mơdró ƀă mơ’no liăn cheăng xuân môi tiah tơrŭm cheăng pơla Kuô̆k hô̆i Việt Nam ƀă Kuô̆k hô̆i râ má môi kong têa Ƀih; thăm tơrŭm pơla péa tơnêi têa a mâu hneăng hôp tơpui tơno rêm pâ môi tiah Khu lâp kong têa, mâu khu tơrŭm Kuô̆k hô̆i râ má môi kơpong ƀă lâp plâi tơnêi.