Kơxêi măng hâi lơ 15/10, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ Leh tơdah kân krip ƀă hlối tơpui rơno tơrá mâu kăn péa tơnêi têa. A rôh tơpui, Kăn xiâm hnê ngăn Kuô̆k hô̆i tối nhên, Kuô̆k hô̆i Việt Nam tơngah ƀă khĕn kơdeăng khât ai pơxúa hneăng lăm pôu, cho tơdroăng leh kân kal khât, veăng ‘mâi mơnhông tơrŭm cheăng pơla péa pâ - péa Kuô̆k hô̆i  tối krê ƀă péa tơnêi têa Việt Nam - Rusi tối tơdjuôm.

Péa tơnêi têa ai tơdroăng tơrŭm cheăng tung tŭm tơdroăng ƀă vâ tối cho pú hmâ tung pêi cheăng. Xua mê, péa Kuô̆k hô̆i kal ‘no hên hnoăng tâ nếo tung mơnhông tơrŭm cheăng péa tơnêi têa. Péa pâ kal tăng mâu tơdroăng tơrŭm ki nếo vâ mơnhông tơrŭm cheăng péa pâ rế tơƀrê, tung mê ai tơrŭm cheăng kâ, tê mơdró, ‘no liăn pêi cheăng.