Drêng troh tơbâ 94 hơnăm Hâi mơjiâng Khu ngăn vâi kơdrâi Việt Nam ƀă Hâi Khu vâi kơdrâi Việt Nam lơ 20/10, kơxê hâi lơ 15/10, a Hngêi pêi cheăng Kuô̆k hô̆i, pôa Trần Thanh Mẫn Kăn xiâm hnê ngăn Kuô̆k hô̆i, pơkuâ roh trâm mâ ngế kăn kơdrâi Kuô̆k hô̆i pêi môi hnoăng cheăng a Tíu xiâm, Ngế kăn ƀô̆ kơdrâi pêi hnoăng cheăng râ xiâm dêi Ƀơrô Kuô̆k hô̆i, Tíu xiâm xéa ngăn ‘na luât.

Tơbleăng a rôh trâm mâ, pôa Trần Thanh Mẫn, Kăn xiâm hnê ngăn Kuô̆k hô̆i tối nhên tơdroăng ki lĕm hmâ pro sap ing nah ‘na khên tơnôu dêi vâi kơdrâi Việt Nam veăng ‘no hnoăng kân tung tơdroăng kring vế, mơjiâng tơnêi têa, châ Pôa Hồ ăm 9 chư mêa” Khên tơnôu, ôh tá xâu, tơdrăng tiô môi troăng - kơhnâ tŭm tơdroăng’’.

Hơnăm 2025 cho hơnăm ‘’pêi rĕng’’ vâ rĕng pêi klêi mâu tơdroăng pơkâ cheăng kâ, rêh ối 5 hơnăm; pro xiâm vâ pêi pro châ tơƀrê tơdroăng Pơkâ hneăng hôp kân rôh má 13 dêi Đảng; hbrâ vâ Hôp kân Đảng rêm râ, klêi mê, troh Hneăng hôp kân Đảng tung lâp tơnêi têa rôh má 14, Kăn xiâm hnê ngăn Kuô̆k hô̆i púi vâ, mâu kăn Kuô̆k hô̆i kơdrâi pêi môi hnoăng cheăng mê, mâu Ngế xiâm pơkuâ, mâu kăn, mâu ngế pêi cheăng a rêm kơ koan, mơngế pêi cheăng dêi Ƀơrô Kuô̆k hô̆i, Tíu xiâm séa ngăn ‘na Luât pơtối rak vế pêi pro mâu tơdroăng ki hiăng châ tơƀrê, kơhnâ veăng ‘no hnoăng tơná tung tơdroăng cheăng dêi Kuô̆k hô̆i.