Mâu hok tro hdrối nah dêi Lếo ki hiăng hriâm a Việt Nam tối tơdjuôm ƀă Hngêi trung Tơrŭm T78 tối krê, đi đo chôu pâ bă khĕn kơdeăn tơdroăng tơrŭm pơla Lếo- Việt Nam ôh tá la lâi pơtê mơnhông tơƀrê tá ki rơdâ ƀă ki trâu tâ nếo tung tŭm tơdroăng tơrŭm cheăng, veăng kum dêi rơpó.

Kăn xiâm hnê ngăn Kuô̆k hô̆i Lếo mơnê Kuô̆k hô̆i Việt Nam hiăng tơmâng khât ƀă nhoăm tơdroăng mơdêk tơrŭm cheăng ki kal pơla Lếo- Việt Nam. Kăn xiâm hnê ngăn Kuô̆k hô̆i Vương Đình Huệ tối tiah kố, Hngêi trung tơrŭm T78 cho môi tung mâu tíu ki tơdjêp, tơ’nôm ăm tơdroăng tơrŭm môi tuăn- tơrŭm cheăng pơla Lếo- Việt Nam thăm krá kak.

Kăn xiâm hnê ngăn Kuô̆k hô̆i tối nhên, kố cho hngêi trung ‘măn ăm mâu hok tro kong têa ê ki apoăng châ mơjiâng proa Việt Nam, xuân cho hngêi trung hnê mâu hok tro Lếo hên má môi sap nah troh nôkố.