Pôa Vương Đình Huệ, Kăn xiâm hnê ngăn Kuô̆k hô̆i veăng ai mâ a rôh po mơdĭng. Kố cho tơdroăng tơkŭm po ki kal, cho rôh vâ kong pơlê Sơn La ƀă mâu kong pơlê Tây Bắc tơbleăng, mơđah kơphế Arabica; pơ-ôu pơ-eăng ngế ki pêt, mơjiâng, uâ pơliê, mơdiê, tê mơdró ƀă tê ngi kong têa; veăng kum mơnhông kơpong pêt kơphế Arabica; dâi lĕm má môi, krá ton.

Nôkố, kơphế Sơn La hiăng châ tê tơmeăm ngi 20 to kong têa ối tung EU, peăng kơnhŏng châu Mih, Trung Đông ƀă mâu kong têa ASEAN ƀă tơdroăng ki tê tơniăn a kơlo ki kơnâ; veăng kum mơdêk pêi lo liăn ăm kuăn pơlê ki pêt, uâ pơliê, tăng cheăng pêi, veăng kum mơjiâng tiô troăng mơdêk ki dâi lĕm ƀă ki kơnía kơphế a Sơn La.

Drêng khế tŏng kum mâu kơtiê hơnăm 2023, pôa Vương Đình Huệ, Kăn xiâm hnê ngăn Kuô̆k hô̆i ƀă Khu kăn ki pêi dêi hnoăng cheăng hiăng mơhnhôk mâu ngế ki xơpá, tŏng kum dêi mâu khu ki ai hiâm mơno hơ-ui châ 100 toăng hngêi vâ kum ăm rơpŏng kơtiê ai tơdroăng rêh ối xơpá ‘na hngêi ối a kong pơlê Sơn La.

Hdrối mê, pôa Vương Đình Huệ, Kăn xiâm hnê ngăn Kuô̆k hô̆i ƀă khu kăn ki pêi dêi hnoăng cheăng hiăng chôu nhăng, pleăng reăng a Tíu xối tơbâ Pôa Hồ - Plông kân Tây Bắc, kong pơlê Sơn La.