Tơpui a leh tơbâ, Kăn xiâm hnê ngăn Kuô̆k hô̆i pơkâ thế, Học viện Tài chính pôi tá la lâi pơtê hơ’lêh nếo pơkuâ ngăn đăi hok tơtro ƀă tơdroăng ki pơkuâ ngăn xêh ƀă pôu râng tơpui tối leăng pơlê pơla, athế cho môi tung mâu tíu pêi cheăng ki djâ troăng ahdrối, pêi pro tơdroăng ki pơkuâ ngăn xêh đăi hok tơƀrê má môi, malối cho pơkuâ ‘no xêh ‘na liăn ngân.

Tối nhên, “Tơdroăng rơkê cho tơdroăng kal dêi tơnêi têa”, mâu ngế cheăng cho liăn ngân ki kal má môi, ai pơxúa pơkâ tơdroăng ki mơnhông dêi hngêi trung, Kăn xiâm hnê ngăn Kuô̆k hô̆i pơkâ thế Học viện Tài chính ai troăng hơlâ tŏng kum tơƀrê pơtối mơdêk khôi túa ki lĕm, mơjiâng Học viện cho môi tung mâu tíu xiâm ki kân dêi lâp tơnêi têa, Kăn xiâm hnê ngăn Kuô̆k hô̆i Vương Đình Huệ diâp ăm thái cô ƀă hok Học viện tài chính Mê dai pêi cheăng ối má Môi (rôh má 3).