Tơpui a rôh hôp, Kăn xiâm hnê ngăn Kuô̆k hô̆i Vương Đình Huệ tối tiah kố, Rôh hôp Kuô̆k hô̆i hơnăm ối nếo Lâp plâi tơnêi rôh má 9 cho tơdroăng cheăng tơpui kâ ki hên kơvâ cheăng kân má môi xua Kuô̆k hô̆i Việt Nam tơkŭm po tung hơnăm 2023.

Rôh hôp hiăng châ tơkŭm po ƀlêi chiâng, veăng kum mơđah tơbleăng tiô túa ki lâp lu ƀă tơniăn lĕm ‘na um méa, tơnêi têa, kuăn mơngế Việt Nam, ‘na Kuô̆k hô̆i Việt Nam, ‘na mơhno túa lĕm tro Việt Nam. Kăn xiâm hnê ngăn Kuô̆k hô̆i xuân tối tiah kố, a rôh hôp Kuô̆k hô̆i hơnăm ối nếo Lâp plâi tơnêi rôh má 9, Kuô̆k hô̆i Việt Nam hiăng rah xo tro inâi ‘na hơ’lêh kơxô̆ ƀă hơ’lêh túa tơmiât rơkê. Inâi kố hiăng pro hâk vâ ăm mâu kăn ki veăng hôp. Tiô Kăn xiâm hnê ngăn Kuô̆k hô̆i, sap ing tơdroăng cheăng tơpui kâ ki hên kơvâ cheăng rôh kố, Kuô̆k hô̆i Việt Nam hbrâ rơnáu tơkŭm po mâu tơdroăng kal ki ê.