VOV4.Xơ Đăng - Kơxê lơ 19/5, a Hngêi Kuô̆k hô̆i, pôa Vương Đình Huệ, Kăn xiâm hnê ngăn tơnêi têa hiăng tơdah Kăn xiâm Grup pơkuâ Boeing hlối Pơkuâ Boeing lâp plâi tơnêi cho pôa Michael Arthur. Pôa Vương Đình Huệ kheăn kơdeăn mâu tơdroăng pêi cheăng dêi Boeing a Việt Nam; tơpui tối ƀă kơvâ tơƀai tối tơdjuôm, ki má lối cho mâu khu ki pro ăm tơƀai hên má môi mơtiah Boeing hiăng tro tơdjâk xua pơreăng COVID-19; tơdrêng amê loi tơngah, klêi kơ’nâi kâi mơdât pơreăng, Boeing kô tơniăn rĕng, ki rơhêng vâ tối cho a kơpong peăng mâ hâi lo pá hdroh châu Á, tung mê ai Việt Nam.

Pôa Vương Đình Huệ, Kăn xiâm hnê ngăn Kuô̆k hô̆i tơdah Kăn xiâm phŏ hnê ngăn Grup pơkuâ Boeing

Pôa Vương Đình Huệ pói vâ, Boeing po rơdâ ivá pêi cheăng dêi Ƀơrô kăn teăng mâ a Việt Nam, pêi kêi đeăng ƀă môi tuăn pơkâ pêi dêi Boeing mơjiâng mâu tíu xiâm hriăn plĕng mơnhông mơdêk ƀă tŏng kum kih thuât a Việt Nam vâ pêi pro hên tơdroăng tŏng kum môi tiah hnê mơjiâng mơngế pêi cheăng, kih thuât, rơnêu tơƀai; loi tơngah Việt Nam kô cho Tíu xiâm pơtroh vâ Boeing pro tíu pêi cheăng ton xŏn.

A Sa Ly tơplôu ƀă tơbleăng