Lăm pôu hngêi pơkeăng lâp plâi tơnêi La Vie ƀă mâu ngế châi tamo dế koi pơlât a kố, Kăn xiâm hnê ngăn Kuô̆k hô̆i Vương Đình Huệ tơmâng xo tơdroăng ki mơ-eăm dêi mâu kăn ƀô̆, ƀok thái pơkeăng, mâu ngế pêi cheăng a Hngêi pơkeăng, tối tơmeăm khoăng dêi hngêi pơkeăng hiăng lĕm xua mơngế Việt Nam a Lếo ‘no mơjiâng pro, rôe tơmeăm xúa tung khăm pơlât.

Kăn xiâm hnê ngăn Kuô̆k hô̆i púi vâ, rêm ngế kăn ƀô̆, mâu ngế ngăn pơkeăng ƀok thái pơkeăng dêi hngêi pơkeăng pơtối rah vế pêi pro tiô tơdroăng ki lĕm  ton nah “Thái pơkeăng môi tiah mơngế nôu ki têm’’, đi đo hmâ achê, khăm ngăn krâu mâu ki châi tamo, veăng ‘no hnoăng tơrŭm krá pơla péa tơnêi têa. Rôh kố, Kăn xiâm hnê ngăn  Kuô̆k hô̆i Vương Đình Huệ hiăng hbru tơmeăm ăm mâu kăn ƀô̆, ƀok thái pơkeăng, mâu ngế cheăng khăm pơklât dêi Hngêi pơkeăng La Vie a Vientiane.