Lăm pôu Ngế xiâm pơkuâ hnê ngăn Đảng, Kăn xiâm hnê ngăn kong têa Lếo Bounnhang Vorachith ƀă Ngế pro xiâm hnê ngăn kong têa Lếo Thongsing Thammavong, Kăn xiâm hnê ngăn Kuô̆k hô̆i Vương Đình Huệ tối phiu ro châ trâm mâu kăn mâu pú nhŏng o, ngế pú hmâ khât dêi Đảng, Tơnêi têa ƀă kuăn pơlê Việt Nam.

Kăn xiâm hnê ngăn Kuô̆k hô̆i Vương Đình Huệ rơkâu mâu kăn xiâm dêi kong têa Lếo drêng troh hâi leh mơjiâng tơnêi têa rôh má 48 ƀă khĕn kơdeăn mâu hnoăng veăng ‘no cheăng tung tơnêi têa, ‘na tơpui kâ ki kân ki Đảng Tơnêi têa ƀă Kuăn pơlê Lếo nhŏng o hiăng châ pêi tơƀrê tung hơnăm hdrối, tung mê ai hnoăng veăng ‘no ki kal dêi mâu kăn xiâm pơkuâ dêi Lếo.

Kăn xiâm hnê ngăn Kuô̆k hô̆i tối loi khât, ing hnoăng pơkuâ rơkê dêi Đảng Nhân yân Kăch măng Lếo, kong têa Lếo kô kâi tơkâ luâ tŭm tơdroăng xơpá, rế ton rế mơnhông tơniăn, pơkuâ dêi, hơniâp ro, kuăn pơlê Lếo nhŏng o rế phâi tơtô ƀă hơniâp ro.