Kăn xiâm hnê ngăn Kuô̆k hô̆i Vương Đình Huệ lăm pôu mâu khu cheăng a tíu tê mơdró ngi kong têa ê Mộc Bài, Tây Ninh
Thứ năm, 10:00, 04/01/2024
Tơplôu: A Sa Ly/VOV4
Tơplôu: A Sa Ly/VOV4
VOV4.Xơ Đăng - Pơtối mâu tơdroăng pêi tung roh lăm pôu pêi cheăng a mâu kong pơlê peăng mâ hâi lo pá Hdroh tơnêi têa, kơxê 3/1, Kăn xiâm hnê ngăn Kuô̆k hô̆i Vương Đình Huệ ƀă khu râ kăn pêi cheăng hiăng trâm mâu khu cheăng pêi cheăng a tíu tê mơdró ngi kong têa ê Mộc Bài; veăng tơdroăng pêi rŭm môi tuăn khu lêng – kuăn pơlê koh phiu roh leh tơbâ 65 hơnăm hâi mơjiâng mô đô̆i gâk tơkăng kong (3/3/1959 – 3/3/2024); diâp kơxuô tơmeăm ăm 100 rơpŏng kơtiê, rơpŏng pá puât kơpong tơkăng kong dêi tơring Bến Cầu, Tây Ninh.
A roh trâm mâ ƀă khu cheăng, Kăn xiâm hnê ngăn Kuô̆k hô̆i Vương Đình Huệ pói vâ Khu pơkuâ, khu cheăng pơkuâ tơtro kơpong tíu tê mơdró ngi kong têa ê Mộc Bài; rơtế ƀă pú hmâ mơjiâng troăng tơkăng kong tơniăn, hơniâp lĕm, nhŏng o, tơrŭm mơhno tuăn pâ pơla Việt Nam ƀă kong têa Kul tối krê, pái kong têa Việt Nam – Lếo – Kul tối tơdjuôm.
Hbrâ Têt Lo hơnăm nếo dế vâ chê troh, Kăn xiâm hnê ngăn Kuô̆k hô̆i pói vâ kong pơlê pêi pro tro tiô pơkâ dêi Khu pơkuâ hnê ngăn cheăng Đảng tơkŭm po tŏng kum Têt ăm kuăn pơlê tiô hiâm mơno ‘’kơbố xuân ai Têt’’.
Viết bình luận