A rôh trâm mâ, mâu kăn teăng mâ Việt Nam a mâu tíu pêi cheăng hiăng tối tơbleăng ‘na tơdroăng cheăng dêi kơ koan teăng mâ Việt Nam a kố, tơdroăng tơrŭm cheăng pơla Việt Nam ƀă mâu kong têa tối nhên mâu tơdroăng hiăng pêi châ tơƀrê tung mâu hneăng lăm pôu dêi Kăn xiâm hnê ngăn Kuô̆k hô̆i Vương Đình Huệ troh mâu kong têa pơla hdrối kố nah hiăng veăng ‘no hnoăng pêi tơdroăng ki kal mơnhông tơrŭm pơla Việt Nam ƀă mâu kong têa, pro trâu rơdâ tâ mâu kơ vâ tơrŭm cheăng ki nếo.

Tơbleăng a rôh trâm mâ, Kăn xiâm hnê ngăn Kuô̆k hô̆i Vương Đình Huệ tối phiu ro tơdah mâu kăn teăng mâ, Ngế xiâm kơ koan teăng mâ tơpui kâ dêi Việt Nam a kong têa ê, tối tơdroăng cheăng tơpui kâ tung pơla hdrối kố nah hiăng châ tơpui rơhéa hên tơdroăng, pêi hên tơdroăng kal, chiâng môi tíu ki bâ eăng tơƀrê tung tâi tâng mâu tơdroăng hiăng châ pêi pro, hnoăng cheăng pêi tơdjuôm dêi tơnêi têa tung hơnăm hdrối mê hía nah.

Malối tung tơdroăng lâp plâi tơnêi dế trâm tơdroăng ôh tá tơniăn, pá vâ ’nâi hdrối, la tơdroăng tơrŭm cheăng tơpui kâ xuân châ tơpui rơhéa hên tơdroăng tá pơla péa pâ, hên troăng, rơkê plĕng tung rak tơdâng tơ’mô, kring vế tơniăn hyôh kong prâi ăm tơdroăng mơnhông tơƀrê, tơrŭm ƀă mâu kong têa tung lâp plâi tơnêi trâu rơdâ.