A rôh tơpui tơno, péa pâ tối phiu ro ƀă hâk tơngăm ‘na tơdroăng ki hiăng pêi pro klêi klêi kơ’nâi vâ chê 75 hơnăm péa tơnêi têa mơjiâng tơrŭm cheăng tơpui kâ, tơrŭm Việt Nam – Bulgaria mơnhông kơhnâ tung tâi tâng mâu kơvâ cheăng kal kí – tơpui kâ, cheăng kâ – tê mơdró – ‘no liăn, khoa hok – kong ngê̆, hnê hriâm – hnê cheăng pêi, gâk kring pơlê pơla cheăm bêng, mơhno túa lĕm tro, tơ’noăng ivá ƀă ôm hyô, tơrŭm pơla kong pơlê.

Péa ngế kăn xiâm hnê ngăn Kuô̆k hô̆i rơtế môi tuăn tối tiah kố, péa pâ ko rĕng hôp Vi ƀan ki ai tơdjâk Chin phuh ‘na tơrŭm cheăng kâ, tê mơdró ƀă khoa hok tung hơnăm kố, po troăng mâu kơvâ cheăng tơrŭm ki nếo, pro tơ’lêi hlâu ăm kơchơ tê mơdró kế tơmeăm dêi dêi rơpó tiô tơkêa Tê mơdró tơniăn krê  Việt Nam – EU EVFTA.

Việt Nam lôu péa ăm mâu khu mơdró kâ Bulgaria ‘no liăn cheăng, tê mơdró mâu kế tơmeăm ki rơdêi. Peăng Bulgaria rơhêng vâ tơrŭm tê mơdró ƀă Việt Nam tung mâu kơvâ ki rơdêi môi tiah kong mgê̆; pơkeăng, kong ngê̆ thong tin, tơmiât rơkê, ôm hyô.