Tối tơbleăng a rôh trâm mâ, Kăn xiâm hnê ngăn Kuô̆k hô̆i Vương Đình Huệ  tối nhên, hơnăm 2023, tung mâu hnoăng veăng ‘no tơdjuôm dêi Kuô̆k hô̆i, đi đo tơmâng rơtế ƀă, veăng ‘no hnoăng ki kal dêi mâu kơ koan chêh hlá tơbeăng. Mâu kơ koan chêh hlá tơbeăng  đi đo hbrâ, pơ’lêh tơná tŭm tơdroăng, teăm tơdrêng, hên tơdroăng chêh dêi Kuô̆k hô̆i troh kuăn pơlê ƀă kuăn pơlê tung lâp tơnêi têa, veăng ‘no hnoăng mơdêk hlê plĕng ƀă môi tuăn kuăn pơlê ƀă mâu pơkâ dêi Kuô̆k hô̆i; djâ luât, luât pơkâ dêi Kuô̆k hô̆i, Vi ƀan pơkuâ cheăng Kuô̆k hô̆i rĕng xúa tung tơdroăng rêh ối.

Hlá tơbeăng hiăng teăm chêh tối nhên, tơdrêng mâu tơdroăng tơchĕng tơmiât púi vâ dêi mâu kơvâ cheăng, mâu khu râ, kuăn pơlê. Kuăn pơlê tơmâng  hneăng hôp Kuô̆k hô̆i cho môi ƀâng ki loi nhoăm va Kuăn pơlê séa ngăn Kuô̆k hô̆i, mâu kăn Kuô̆k hô̆i, ai tơdroăng tơpui hmâng ing péa pâ.

Kăn xiâm hnê ngăn Kuô̆k hô̆i tối pơchân, Kăn hnê ngăn ƀă rak ngăn khu chêh hlá tơbeăng pơtối mơdêk ki tơƀrê khên tơnôu kal kí; tơmâng ăm hriâm tơ’nôm mâu ngế cheăng chêh hlá tơbeăng, mâu ngế rah chêh mâu tơdroăng tơdâng tơ’mô hnoăng cheăng châ pơcháu, vâ troh leh tơbâ 100 hơnăm Hâi chêh hlá tơbeăng Việt Nam hơnăm (21/6/1925 - 21/6/2025).