VOV4.Xơ Đăng - Kơxo lơ 14/4, a Hngêi Kuô̆k hô̆i, pơxiâm po roh hôp roh má 10 dêi Viƀan pơkuâ Kuô̆k hô̆i. Xông tơpui pơxiâm po Roh hôp, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi: a roh hôp, môi tung mâu tơdroăng xiâm ki kal Viƀan pơkuâ Kuô̆k hô̆i kô tơpui ‘na tơdroăng tối hdrối Tơdroăng séa ngăn hơnăm 2023; Tơbleăng tơdroăng châ tơƀrê séa ngăn tơdroăng tơkêa bro ‘’Tơdroăng pêi pro troăng hơlâ, luât ‘na tơdroăng pơkâ pêi sap ing Luât pơkâ pêi ai xêt khât ăm pêi pro’’. A roh hôp, Khu pơkuâ Kuô̆k hô̆i môi tuăn tơ’nôm tơdroăng mơjiâng Luât, luât hơnăm 2022 Pơkâ dêi Kuô̆k hô̆i ‘na pro ton xŏn hâi khế pêi pro tâi tâng Pơkâ 42; môi tuăn pêi pro mơ-éa pro ‘nâng ‘nâi tơbleăng ăm pêi pro Pơkâ a hneăng hôp khế 5 hơnăm kố, hâi khế pêi pro dêi Pơkâ pro mơdon hâi khế pêi pro tâi tâng khu pơkâ 42 troh hâi lơ 31/12/2023. Khu pơkuâ Kuô̆k hô̆i pơkâ thế Chin phuh tơmâng xo rơkong veăng tơpui, ‘mâi pơhlêh kêi đeăng tơbleăng mơgêi pêi pro Pơkâ 42 dêi Kuô̆k hô̆i ƀă hô sơ pơkâ pơtroh mâu kơ koan dêi Kuô̆k hô̆i ƀă mâu kơ koan séa ngăn.