VOV4.Xơ Đăng - Pơtối tơdroăng pêi cheăng ƀă kăn ƀô̆, kơvâ xo rơkong veăng tơpui tối kêi đeăng Tơdroăng tơkêa bro ‘’Troăng pêi ton xŏn mơjiâng ƀă kêi đeăng Tơnêi têa tiô luât xah hô̆i chuh ngiah Việt Nam troh hơnăm 2030, tơmiât pêi troh hơnăm 2045’’, mê hâi lơ 7/7, pôa Nguyễn Xuân Phúc, Kăn xiâm hnê ngăn tơnêi têa pơkuâ roh pêi cheăng ƀă Đảng ŭy Kŏng an râ xiâm Tơnêi têa, mâu kăn pêi cheăng tung Đảng bô̆ hnê arak luât. A mâu roh pêi cheăng, mâu rơkong veăng tơpui tối, tơpui tơno kheăn kơdeăn Khu hnê mơhno mơjiâng Tơdroăng tơkêa bro hôm rơkê, dâi lĕm, tro tiô tơdroăng ƀă tơdroăng nôkố, tơdrêng amê veăng tơpui ‘na khu tơrŭm cheăng ƀă tơdroăng dêi kơvâ Kŏng an, kơvâ hnê arak luât.

Tung mê hên rơkong veăng tơpui tối ‘na pơ’lêh nếo tơkŭm po ƀă tơdroăng pêi cheăng dêi kơ koan séa ngăn, mâu ngế pêi cheăng tung kơ koan pêi cheăng tơleăng tơdroăng xôi tơtro ƀă tơdroăng pơkâ Việt Nam, tơniăn, gak kring hnoăng kuăn mơngế tung tơdroăng mơjiâng tơnêi têa, mot tơrŭm lâp plâi tơnêi.

Xông tơpui hnê mơhno a roh pêi cheăng, ƀă mâu tơdroăng pơkâ tung Tơdroăng tơkêa bro ai tơdjâk troh kơvâ Kŏng an, kơvâ hnê arak luât ƀă hên kơ koan ki ê, Kăn xiâm hnê ngăn tơnêi têa pơkâ thế Khu hnê mơhno má môi ối tung Khu hnê mơhno kô pơtối tơmâng hên rơkong veăng tơpui tối tung mâu roh pêi cheăng, ing mê, tơkŭm tâi tâng vâ tơbleăng ăm Khu hnê mơhno séa ngăn rah xo troăng pêi tơtro.

A Sa Ly tơplôu ƀă tơbleăng