Teăng mâ Kuô̆k hô̆i Việt Nm, Kăn xiâm hnê ngăn Quốc hội Vương Đình Huệ rơkâu Kul tơkŭm po klêi tơniăn hneăng tâ phĭu rah xo kăn Kuô̆k hô̆i hneăng má 7; rơkâu pôa Samdech Hun Manet châ Kuô̆k hô̆i loi tơngah vâ rah xo pôa pro Ngế pro xiâm hnê ngăn Chin phuh  pơtáu.

Kăn xiâm hnê ngăn Quốc hội Vương Đình Huệ loi khât tiah kố, Kul kô pê klêi hên tơdroăng ki kân tâ, veăng mơdêk ki rơdêi dế Kul a kơpong ƀă tung lâp plâi tơnêi. A rôh hôp, péa ngế kăn rơtế tối mâu tơdroăng ki tơƀrê hiăng pêi pro tung tơrŭm cheăng kâ, tê mơdró  pơla péa tơnêi têa.

Hơnăm 2022, kơxô̆ liăn châ xo ing tê mơdró kế tơmeăm pơla péa pâ rôh apoăng luâ 10 rơtal dollars. Langiâ kố ah, péa pâ thế tơkŭm tơrŭm, tŏng kum dêi rơpó mơnhông cheăng kâ krê tơniăn, pơkuâ dêi, hriăn tăng troăng tơrŭm cheăng ƀă lâp plâi tơnêi; mơdêk tăng troăng tơdjêp cheăng kâ pơla péa pâ, tá tơdjêp pêi tơdroăng cheăng ki pá, ki hlâu, malối cho 2 pâ kal mơdêk tơdjêp ƀă dêi rơpó tung mơjiâng pro troăng prôk, tung mê ai tơdjêp pro troăng kân tơdrăng lĕm, tâk tơ’nôm ăm mâu rôh tơƀai kơneăng tơdrăng pơla péa  tơnêi têa.